Malaysia-ah Alex Marquez tlan chak ber

Nimin khan Malaysian MotoGP tlan a ni a, rider championship-a pahnihna ni chiang tawh Alex Marquez chuan hnehna changin a chunga awm Marc Marquez nen an inkar a ti zim hret, awmzia erawh a awm tawh lo.

Bike intlansiakna sang berah hian Marc Marquez a champion fel tawh - Spanish rider hi a champion hnuah a chesual a, kumin chhungina intlansiak ve dawn tawh lo, pakhat leh pahnihna dinhmun a chiang tawh a ni.

Sepang Circuit-a intlansiakah Alex Marquez hian lap hnihna aṭangin hma a hruai a, a hnu lamah a kawi kir tawh lo; a hmasa ber aṭanga tlan chhuak Francesco Bagnaia erawh a tlan tluan ve thei ta lo.

Kum 29 mi Marquez chuan, "Zirtawpnia tlan chhinna kan neih ṭum khan vawi hnih kan chesual a, a hnu lamah kha chuan kan fimkhur tawh hle. Nomawi beisei theih ni tawh lo mah se, intlansiak a la zawh loh avangin ṭha taka tlan zel hi a pawimawh.

"Keimah chauh ni loin team pumpui kan lawm, tuna kan chet dan aṭang hian season thara ṭan lak zual kan ngaihna lai tam tak kan hre thei a, tun hun chauh ni loin nakin hun pawh kan ngaihtuah tel a ngai," a ti.

Tun season chhungin Portigal Grand Prix leh Valencia Grand Prix te an la tlan chhunzawm dawn a, heng inelna pahnihah hian champion Marc Marquez chu a hmel kan hmu ve tawh lo ang.