Hakimi hoin PSG an chak

Achraf Hakimi-a goal hnih bakah hun tawp dawna Desire Doue-a goal khat hmangin Paris Saint Germain chuan an mikhualna ramah Brest 3-0 in an hneh a, Ligue 1 table chung berah an awm chhunzawm.

Luis Enrique naute hian Stade Francis-Le Ble-ah inkhel an thunun hneh hle a, a tir aṭanga a tawp thlengin harsatna lian an tawk lo. Hakimi hian tun season atan a goal hmasa ber chu Vitinha hnen aṭanga a through ball hmuh a khung.

Chawlhlawk hma hretin Hakimi bawk hian angles zim tak aṭangin a goal hnih a khung a, mualneltu Brest lamin sut ṭhet theihna remchang nei mah se Romain del Castillo chuan penalty a hlah.

PSG tan hian Ousmane Dembele pawh a inlan thei tawh - Ballon d'Or dawngtu hian August hnua a vawi khat nan Ligue 1 match a khel a, goal khung nghal lo mah se Paris club tan chuan lawmna tur a ni ang.

PSG coach Enrique chuan, "Brest hi chu hmachhawn an harsa dawn tih kha kan hre lawk vek a, kan rin lawk ang ngeiin a awlsam lo hle. Hla tak tak aṭangin ball an in pe dik chat chat thei, khatiang team hmachhawn kha chu a awlsam ngai lo.

"Ni thum dan lek lekah tunlai chu kan inkhelh zel a ngai, match tinah hnehna chan kan duh bawk si avangin a hautak ṭhin khawp mai. Ligue 1 bakah inelna dang pawh kan ngaih pawimawh tel a ngai a ni," tiin a sawi.

Kar laihawlah Champions League a khel a, chumi hnuah Ligue 1 an khel chhunzawm. Tun kar Nilaini zan hian league match khel turin Lorient an lenchilh zui leh nghal ang.