A sang zel dawn - Bethlehem Vengthlang FC

24th November, 2016

Flying Christabel Mizoram Pre-mier League Under 18-ah Bethle-hem Vengthlang FC an champion.

Thawhlehni zan khan Lammual-ah MPL U18 final khelh a ni a, BVT-in minute 86-naa K. Lalmalsawma penalty hmangin Chanmari West FC chu 1-0 in an hneh. Bethlehem Vengthlang mipuiin Chanmari West supporter an tam hneh a, an champion-na kawngah mipui an pawimawh - "A sang zel dawn, a sang zel dawn, BVT FC," tiin an zai rual e.

BVT hi MPL U18-a an champion vawi khatna niin fair play award an dawng bawk. MPL kum bithliah inelna hmasa pahnihah Chanmari FC an champion a, inelna hnuhnung pahnihah Mizoram Police-in nomawi an chawi ve ve thung.

Intluk tawk

Club pahnih hi league round-ah 3-3 in an inhnehtawk a, final-ah pawh hian an fimkhur dun hle. Goal khung ngeina tur chance ṭha hmuh tur a awm lo.

BVT right winger Lalawmpuia'n a kut hmanga goal chance a insiam avangin yellow card pek a ni. West Warrior forward Lalenkawla'n halfway line bul aṭanga Lalruatpuia freekick chu goal-ah pet mah se keeper Ramdinzela'n a dan sak.

Second half-ah BVT-in an nawr ngam avangin inkhel a nung sawt a, West Warrior player-te an thawhrim avangin final thlenna kawnga BVT midfielder pawimawh Lalruattluanga'n a duh thalin ball a sem thei lo. League round-a goal 10 khung thei Enkawla freekick a goal teuh a, hemi hnua forward C. Lalthansanga freekick petin crossbar a per leh avangin BVT an vannei.

Hun tawp hma minute nga chiah a awm tawh tihin BVT forward Joel Lalmuanpuia lakah West Warrior defender Ruatpuia'n penalty a chawi a, BVT senior team-ah pawh player pawimawh ni phak Malsawma'n best keeper atana thlan Lalrinchhana bumin champion-na goal a thun.

Team dang an ni - Hluna

Chanmari West coach Lalram-hluna chuan, "Ka naute khelh danah ka lawm a, penalty chungchangah pawh sawisel tur ka nei lo. Referee khan thutlukna dik a siamah ka ngai. Amaherawhchu chiang taka ka hriat chu BVT hi match hmasa lama kan hmachhawn ang kha an ni tawh lo a, team dang daih an ni," tiin an khingpui team chungchang a sawi.

BVT an huaisen

Bethlehem VT hi league round-ah an hun tam zawk palinaah an awm a, champion rinkai an ni lo.

An match hnuhnung pahnihah Aizawl FC leh Zo United hneh lo se chuan knockout stage an lut lo ang, amaherawhchu Benjamin Lalhriatpuia hoten group match hnuhnung pahnihah hnehna an chang. Hei hi duh tawk mai loin league round-ah anmahni sawptu Chhinga Veng chu 3-1 in an hneh let a, final-ah champion rinkai Chanmari West an hneh leh bawk.

BVT coach Benja chuan, "Chan-mari West te hi 1st Bn MAP Academy player-te tho an nih avangin final hmaa first division match an neih an tuar niin a lang. First half-ah goal venhim tawp kan tum a, an chauh hun kan nghak a, second half-ah kan nawr a, kan vannei tel bawk. Kan nauten thu an awih a, theihtawp kan chhuahna rah Pathianin mal min sawm a ni," tiin awmze neia game plan an siam thu a sawi.

Chanmari West coach thusawi chhangin BVT boss chuan, "West Warrior nen kan intawn hmasak ṭum khan exam hunlai a nih avangin kan kim lo. Kan striker rinawl Joel pawh exam vangin second half-ah chiah a inlan thei a, final-ah chuan kan kim ṭhap tawh a ni," tiin an intawn hmasak aia an ṭhat zawk thu a sawi.

Final Kalkawng

ROUND 1 - October 18, Thawhtanni

Dinthar FC 1 - 3 Bethlehem VT

BVT : C. Lalrintluanga 47'; Michael Lalṭanpuia 66';

Joel Lalmuanpuia 81'

ROUND 2 - October 21, Zirtawpni

Bethlehem VT 3 - 3 Chanmari West

BVT : Joel Lalmuanpuia 62', 69'; K. Lalmalsawma 86' (P)

ROUND 3 - October 25, Thawhlehni

Bethlehem Vengthlang FC 1 - 3 Chanmari FC

BVT : C. Lalrintluanga 90+2'

ROUND 4 - October 27, Ningani

Ramhlun North FC 0 - 2 Bethlehem VT

BVT : Michael Lalṭanpuia 23'; Lalnuntluanga 51'

ROUND 5 - November 4, Zirtawpni

Chhinga Veng FC 3 - 1 Bethlehem VT

BVT : Joel Lalmuanpuia 87'

ROUND 6 - November 7, Thawhṭanni

Bethlehem FC 1 - 0 Aizawl FC

BVT : Joel Lalmuanpuia 60'

ROUND 7 - November 11, Zirtawpni

Bethlehem VT 4 - 1 Zo United

BVT : Lalawmpuia 34'; David Lalrinsanga 48';

PC Lalramdinpuia 70'; Lalruattluanga 80'

SEMIFINAL - November 17, Ningani

Chhinga Veng 1 - 3 Bethlehem Vengthlang

BVT : PC Laltlanhlua 53'; Lalvenkima 54'; Joel Lalmuanpuia 63'

FINAL - November 22, Thawhlehni

Chanmari West 0 - 1 Bethlehem VT

BVT : K. Lalmalsawma 86' (P)

ZoFooty Statistics

Bethlehem VT 1 - 0 Chanmari West

BVT : K. Lalmalsawma 86'

49% Ball Possession 51%

10 Shot(s) 13

2 On Target 7

2 Yellow Card(s) 3

0 Red Card(s) 0