Southgate-a'n interview a zo

England manager nghet ni turin Gareth Southgate chu Football Association chuan inter-view an neih-pui a, darkar thum zet interview an neih chhungin thil a kaltluang hle niin an tarlang - FA hian kum 46-a upa manager lo hi interview neihpui dang an nei lo.

England Under-21 coach hi FA-in coach la tura an ruat FA chair-man Greg Clarke, chief executive Martin Glenn, technical director Dan Ashworth, League Mana-gers' Association chairman Howard Wilkinson leh England defender hlui Graeme Le Saux ten interview an neihpui a, engkim tluang takin kal mah se thla tawpa ṭhu-khawm tur FA board lamin panel a ruatte thutlukna a pawm leh phawt a ngaih dawn avangin November 30 hma chuan engmah puanchhuah a ni lo ang.

FA chief executive hlui Mark Palios chuan, "Panel a ṭhute hian Gareth hi an hrechiang vek a, Under-21 lama a hnathawh dante pawh an hmuchiang em em. Interview an ti tak nang a, a awmzia takah chuan a hnathawh turte an hrilhfiahna hun ni berah ka ngai," tiin Southgate chu England manager nghet ni tura a beisei thu a sawi.

FA hian thamna sum lak vanga Sam Allardyce an ban hnuah Southgate hi match li chhung England kaihruai lailawk turin an ruat a, Middlesbrough boss hlui hian World Cup qualifier-ah England hi Malta leh Scotland hnehin Slovenia a draw pui a, friendly match-ah Spain a inhnehtawkpui bawk.