Record siam zanah Dortmund chak chiang
Marco Reus kir zanah Borus-sia Dortmund-in goal riat an khung a, Champions League group stage-ah hnehna chang turin Legia Warsaw chu 8-4 in an sawp - goal 12 luhna inkhel hi Champions League match khata goal luh hnem ber ṭum a ni.
Kum 2003 khan Monaco chuan Deportivo La Coruna chu 8-3 a sawpin Champions League match khata goal lut hnem ber record team pahnih hian an lo siam tawh a, Dortmund leh Warsaw hian an rawn khum ve leh ta - Polish club Legia hi goal li khung chunga Champions League match-a tlawm awmchhun an ni bawk.
Reus a lo kir
Minute 22 a thlen meuh chuan goal li a lut der tawh a, Dortmund tana player langsar ber chu thla ruk hnua a vawi khat nana inlan Marco Reus a ni - Germany international hian a thiam a la theinghilh lo tih pholangin goal thum a khung. Dortmund tan Reus bakah Shinji Kagawa chuan goal hnih a khung bawk a, Nuri Sahin, Ousmane Dembele leh Felix Passlack ten goal khat ṭheuh an khung ve bawk.
Hliam vanga 2014 World Cup leh Euro 2016-ah pawh inlan thei lo Reus chuan, "Rei tak hnua inkhel bul ka ṭan leh thei ta hian min ti lawm takzet a ni. Zanina ka lo kir leh dan hi duhthusam a ni a, ka lo suangtuah ṭhin chu a ni. He hun lo thleng tur hi nghakhlel takin ka thlir ṭhin a, chu chuan zanin hi a ti nuam lehzual a ni. Ball-ah hian ka ṭhiante zawng zawngin an hming an ziak vek ang a, inah uluk takin ka dah ṭha ang," tiin a hlim hle.
Bale-a inhliam
Group F inkhel dangah Real Madrid-in 2-1 in Sporting Lisbon hneh mah se an lawm a kim lo. Hliam vangin Gareth Bale chu lak chhuah a ni - Wales forward hian kerek hliam vangin December 3-a Barcelona nen El Clasico an khelh turah a hmel a lan thei lo hial mai thei.
Madrid coach Zinedine Zi-dane chuan, "Bale-a hliam hi eng ang chiah nge a nih a la hriat loh a, kan medical staff ten a hliam dinhmun an enfiah phawt hnuah engkim a chiang chauh ang," tiin a player chungchang a sawi.
Cristiano Ronaldo-a'n amah siam liantu club a hmachhawnna inkhelah Raphael Varane-a goal hmahruai chu Portuguese club tan Adrien Silva-a'n penalty aṭangin sut mah se minute 64-naa Joao Pereira hnawhchhuah a nih avanga tlem zawka khel Sporting an ṭang tluan thei lo a, substitute Karim Benzema chuan minute 87-naah Real chakna goal a khung a ni.
Hmabak chu
Group F-ah hneh loh la tawng lo Borussia Dortmund leh Real Madrid-in last 16 an lut chiang a, team pahnih hi De-cem-ber 7 zanah group stage match hnuhnung ber khelin an inhmachhawn leh ang. German club-in point hniha hma an hruai mek avangin Real lakah point an hlawh chhuak a nih chuan hmahruaitu nichungin last 16 an lut dawn tihna a ni a, knockout stage-a team ṭha pumpelh turin Real tan chak ngei a ngai thung.
Inkhel Results
Borussia Dortmund 8 - 4 Legia Warsaw
BOR: Shinji Kagawa 17', 18'; Nuri Sahin 20'; Ousmane Dembele 29'; Marco Reus 32', 52', 90'+2; Felix Passlack 81'
LEG: Aleksandar Prijovic 10', 24'; Michal Kucharczyk 57'; Nemanja Nikolic 83'
Sporting Lisbon 1 - 2 Real Madrid
SPO: Adrien Silva 81'
REA: Raphael Varane 29'; Karim Benzema 87'
Team Dinhmun
Group F
Team Pld W D L GF GA GD Pts
Borussia Dortmund 5 4 1 0 19 7 12 13
Real Madrid 5 3 2 0 14 8 6 11
Sporting CP 5 1 0 4 5 7 -2 3
Legia Warszawa 5 0 1 4 8 24 -16 1
Inkhel Chhehvel
Dortmund 8 - 4 Warsaw
• Champions League match khata player pariatin goal an khung hmasak ber a ni.
• Dortmund hi Liverpool, Monaco leh Real Madrid hnua Champions League match khata goal riat khung leh thei hmasa ber an ni.
• Ajax-in October 3, 1984-a Luxembourg club Red Boys Differdange 14-0 a an sawp hnua Europe inelnaa match khata goal 12 a luh tlin leh hmasa ber a ni.
• European Cup/Champions League chanchinah Feyenoord chuan September, 1969 khan Iceland club KR chu 12-2 in an hneh a, tun hi hemi hnua European Cup/Champions League-a goal a luh hnem ber ṭum a ni.
• Dortmund hian Legia lamah tun season-ah goal 14 an khung tawh a, Champions League-a club pakhat laka goal khung hnem ber an ni.
• Manchester United midfielder hlui Shinji Kagawa-a'n goal hnih khung turin second 76 bak a mamawh lo a, Champions League-a goal hnih khung rang ber a ni.