Chak mamawh United hmaah Feyenoord
Manchester United chuan zanin dar 1:15 hian Europa League group stage match khel turin Feyenoord an mikhual dawn a, Jose Mourinho-a naute tan knockout round lut turin chak loh a thiang tawh lo.
United hian Group A-ah pathum-na dinhmun luahin an chunga awm Feyenoord leh Fenerbahce hi point khat ve vein an phak lo a, zaninah an chak zo lo a nih chuan an group match hnuhnung bera Zorya Luhansk an hneh a nih pawh in Feyenoord leh Fenerbahce result-ah an innghah a ṭul tawh ang.
Jose Mourinho-a naute hian Dutch club hi an hneh thei a nih erawh chuan point hniha tlanpelin pahnihna dinhmun an luah ang a, zanina inkhel tur tho Fenerbahce leh Zorya Luhansk result a zirin group hruaitu nih chance hial an nei.
Mkhitaryan inlan dawn
Nipui bazar-ah Manchester United-in Henrikh Mkhitaryan an lalut a, season hmasa Bundesliga Player of the year hian inelna hrang hrangah United tan match ruk chiah a khel - zaninah erawh a inlan tur thu Mourinho-a'n a sawi chiang tawh.
Portuguese manager chuan, "Arsenal nen kan inkhelh ṭum khan Mkhitaryan hnenah hian game lian hmachhawn tura a la inpeih loh thu ka hrilh a, Feyenoord hmachhawn tura inpeih tur erawhin ka hrilh a ni. Hmun a chan tam loh avangin a lunghnur ngei a, mah se a lawm lohna hi a ṭha zawnga chantirin a thawkrim hle a ni," a ti.
Zlatan Ibrahimovic-a'n an match hnuhnung berah hrem vangin Arsenal hmachhawn thei lo mah se Dutch club lakah a lo kir beisei a ni a, centre back pahnih Chris Smalling leh Eric Bailly la inhliam mah se Phil Jones a dam ṭha tawh a, English defender hian a zawna a vawi thum nan inkhel bul a ṭan beisei a ni.
Team dinhmun
Feyenoord-in season ṭantira an match hmasa 12-ah vawi 11 hnehna chang thei mah se an match hnuhnung pangaah vawi khat chiah hnehna an chang thei. Dutch club hi zuam ngawt erawh tihsual theih a ni - an match hnuhnung berah PEC Zwolle chu 3-0 in an sawp leh tawh a, Eredivisie (Dutch league)-ah hmahruaitu niin pahnihna Ajax aia an sanna chu point hnih a ni.
United-in Old Trafford-a an match hnuhnung pathumah Stoke City, Burnley leh Arsenal an inhnehtawkpui vek a, an mikhual tur Feyenoord tan thil hriat nuam tak a ni ngei ang.
En bik tur
Mourinho-a'n Henrikh Mkhitaryan a chhawr tur thu a sawi avangin Armenian mid-fielder hian en bik a hlawh ngei dawn tih a chiang a, zaninah United-a hmun chan a phu tih pholan a tum ang.
Feyenoord-in club legend Dirk Kuyt an nei a, kum 36-a upa striker hian an league match hnuhnung berah goal khunga a thiam a la theihnghilh lo tih a pholan avangin United tlarhnung tan ven uluk a ṭul dawn.
Liverpool striker hlui hian Merseyside club tan a khelh laiin March 2011 khan English football-a a hattrick hmasa ber chu Manchester United lamah a khung a, tun thlengin Reds fan-te ngainat a hlawh phah - United lama goal thun hi a chak zek zek ang.
Thawnthu hlui
United leh Feyenoord hi tun hmain match thumah an inhmachhawn tawh. Team pahnih intawn hmasak ber chu 1997/98 Champions League group stage kha a ni a, United-in hnehna chang ve vein Old Trafford-ah 2-1 a hnehna chang-in khualmualah 3-1 in hnehna an chang bawk.
United hi inchhuang tur erawh an ni lo. Europa League group stage-ah Feyenoord hi an lenchilh tawh a, Dutch rawlthar duhawm Tonny Vilhena an ven hneh loh avangin 1-0 in an tlawm tawh - mikhual team hian inrintawkna nasa tak nen Old Trafford an pan ang.