Sevilla ngamtu Juventus an tlang

Italian champion Juventus-in Thawhlehni zan khan Sevilla chu 3-1 in an hneh a, Champions League last 16 an lut chiang ta. Juventus khelmualah team pahnih hi goal awm loin an lo inhnehtawk tawh a, Thawhlehni zanah erawh goal li ngawt a lut.

Group H inkhel dangah Lyon chuan Alexandre Lacazette goal khung hmangin Dinamo Zagreb chu 1-0 in an hneh bawk a, group stage match hnuhnung bera an hmachhawn tur Sevilla an tlawm bawk avangin last 16 lut turin bei-seina thar an nei ve leh ta bawk - knock-out stage lut tur erawh chuan Sevilla hi 2-0 tala an hneh a ngai ang.

Boruak sang

Inkhel ṭan aṭanga minute 9-na lekah beisei loh zawk Sevilla-in Nico Pareja hmangin goal hmahruai an khung a, Europa League champion-in goal an khung hmasak hnuah chanchin lawmawm erawh an neih chhunzawm lo - Franco Vazquez chu minute ruk chhung leka Juan Cuadrado leh Sami Khedira laka yellow card a chawi avangin hnawhchhuah a ni a, player kim loa khel Sevilla laka an si phurh sut turin Juventus-in hun an mamawh rei lo.

Chawlhlawk hman a nih hma lawkin Sevilla defender Gabriel Mercado chuan Leonardo Bonucci a tih tluk avangin penalty a chawi a, Claudio Marchisio tan an si phurh sutna tura penalty khung chu thil harsa a ni lo. Sevilla an talbuai tawlh tawlh a, second half
ṭantirah coach Jorge Sampaoli chu a chetdan mawi lo avang-in technical area aṭangin hnawhchhuah a ni.

Higuain tel lo pawn..

Juventus-in inkhel an thunun chhunzawm a, hun tawp nan minute ruk chiah a awm tawh tihin Leonardo Bonucci chuan an hmahruaina goal a khung a, injury time-ah Mario Mandzukic chuan goal thumna a khung ve leh bawk - Italian club hian tlarhmaah hliam vangin an striker chhuanvawr pahnih Gonzalo Higuain leh Paulo Dybala chhawr thei lo mah se goal khung an harsat lo tih an pholang.

Juventus boss Massimiliano Allegri erawh a lawm a kim lo. Italian coach chuan, "Kha aia hriam zawk tur kha kan ni a, chance ṭha pangngai an neihchhuna goal kan chhuah nghal ringawtte kha a dik lo a ni. Last 16 kan luh avangin kan tum ram pakhat chu kan thleng phawt a, tunah chuan Krismas hmaa Serie A chung bera awm leh Doha khawpuia Italian Super Cup chawi kan tum leh dawn a ni," tiin hmachhawp a thlir lawk.