Chak lo Tottenham an tla

Tottenham Hotspur chu Cham-pions League group stage aṭanga pet thlak an ni. Premier League-a hneh loh la tawng lo Spurs hian Europe-ah beisei an phak lo. Thawh-lehni zan khan AS Monaco lakah 2-1 a chak loin match khat khelh hmabak la nei mah se an tan knock out round luh theih a ni tawh lo.

A goal mawlh mawlh

Stade Louis II-a in-khel-ah Mona-co tan defender Djibril Sidibe chuan second half minute thumnaah goal hmahruai a tauh lut. Goal hmasa ber luh aṭanga minute li hnu lekah Harry Kane chuan Dele Alli-a penalty hlawh chhuah chu goal-ah chantirin an si purh a sut; Spurs lawm chhung a rei bik lo, goal an khung aṭanga second 39 lekah an chhuah leh nghal - Thomas Lemar chuan he inkhela goal thumna leh an chakna ni bawk chu a khung.

Tottenham hian ball chang tam zawk mah se a hmawr an bawk fuh thei lo a, goal zawnah vawi hnih chiah an pet. Inkhelh chhung zawngin Monaco an hlauhawm zawk, centre back Eric Dier-a'n Fabinho lakah penalty a chawi chu Radamel Falcao chuan petin goalkeeper Hugo Lloris-a'n a lo dan sak. French international hian Benjamin Mendy leh Valere Germain te goal khung tur ṭha taka dang bawkin Spurs mualpho lutuk tur a hliahkhuh.

French Ligue 1 club Mo-naco hian match nga khelh aṭanga point 11 hmuin Group E hma-hruaitu ni chungin last 16 an lut a, inkhel dangah Bayer Leverkusen leh CSKA Moscow te chu 1-1 a inhneh-tawkin Bun-desliga club hian point sarih hmuin an tlang ve bawk.

Tottenham hian group match vawi nga an khelh tawh aṭangin vawi khat chiah hnehna an chang a, point li an hmu. December 7 khian an hnuaia awm CSKA Moscow nen an inhmachhawn leh ang. Spurs hian point thum hmuh belh pawh ni se head-to-head ah German club an tluk thei tawh lo.

Eng nge an sawi?

Tottenham manager Mauricio Pochettino chuan, "Kan hun ṭha kan chhawr
ṭangkai theih loh avangin kan tla a, a chhan dang pakhat chu kan khelmualah point thum kan hmu thei lo kha a ni. Kan chak lohna aṭang hian kan inzir ang a, hmasawn kan tum ang. Tunah chuan Premier League-a kan elpui te nena kan inkar tih zim dan kan ngaihtuah ang," a ti.

Spurs hi Premier Lea-gue-ah pa-ngana an ni mek a, hmahruaitu Chelsea nen an inthlauhna chu point li chiah a ni. Inrinni zan dar 11:00-ah Chelsea khel-mualah an lenglut dawn.

Monaco coach Leo-nardo Jardim chuan, "Hma-hruaitu ni chungin kan tlang a, ka naute an khelh ṭhat avangin lawmna tur hlir a ni. Tunah chuan quarterfial kan luh theih dan tur kan ngaihtuah ang," tiin a sawi.