Mumang ramah Leicester

Claudio Ranieri-a en-kawl Leicester City-in season hmasain Premier League nomawi an chawi a, khawvel an barakhaih. Italian manager kaih-hruaina hnuaiah Foxes chuan Club Brugge 2-1 a hnehin Champions League an vawi khat khelh naah last 16 an lut leh ta!

Thawhlehni zan inkhelh hmain Foxes hian knock out round lut turin point khat bak an mamawh tawh lo a, an mikhual lakah Shinji Okazaki leh Riyad Mahrez ten goal khungin point thum an hlawh chhuak - match khat khelh hmabak la nei chungin Group G hma-hruaitu an ni chiang tawh. An group aṭang hian Porto (8 points) leh Koben-havn (6) ten hmun ruak pakhat an inchuh ang.

A mak!

PFA Player of the Year Mahrez chuan tun kartir khan Premier League aṭanga an tlak a hlauh loh thu a sawi a, hei hian Foxes din-hmun a him tawk loh zia a ti lang.

Leicester hian league match 12 khelh tawh aṭangin point 12 chiah an la hmu a, table-a 18-na Hull City nen an inthlauhna chu point hnih chiah a ni. An tiatpui nia ngaih Hull, West Brom leh Watford te an hneh loh laiin Champions League lamah chuan Brugge vawi hnih an hneh bakah Porto leh FC Copenhagen te lakah vawi khat ve ve hnehna an chang bawk.

Leicester hian Cham-pions League match liah hnehna an chang tawh a, an match hmasa paliah phei chuan goal an chhuah miah lo. Premier League lamah chuan vawi thum chiah chak ni hmel an la hmu thung.

Ranieri-a'n hmalam a thlir

Leicester City mana-ger Ranieri chuan, "Tlin pawh a harsat laia group hmahruaitu nih chu beisei aia sang a ni tawh. Ka player, min ṭantu leh he club tana tha tawhtu zawng zawng chungah lawmthu ka sawi. Ball kan chan hnem bakah hun ṭha kan insiam tam em em a, khatiang bawk khan league lamah pawh khelh zui kan tum ang," tiin a sawi.

Italian manager chuan sawi chhunzawmin, "Tu nge kan nih hi kan hriat-chian a ṭul a, kan khingui tur chu tu pawh ni se football-ah chuan result a sawi lawk theih loh. Thawnthu ngaihnawm dangdai tak kan ziah chhun-zawm zel ka beisei," a ti.