Saina a chak ve leh ta

Rio Olympic hnua a match hmasa berah Saina Nehwal chak lo nghal mah se Hong Kong Open Open-ah erawh harsatna nei loin hnehna a chang ve leh ta.

Hong Kong Coliseum-ah nimin khan Indian shuttler hian first round khelin Thailand nula Porntip Buranaprasertsuk lakah game hamsa ber a hloh hnuin darkar khat dawn an inkhelh hnuah 12-21, 21-19, 21-17 in hnehna a chang.

A khup zai a nih hnuah Saina hi karhmasa khan China Open-ah a inlan a, a match hmasa berah a chak lo nghal. Hemi hnu hian world number 1 hlui Saina chuan beiseina sang zawk nen inelna dang a hmachhawn tur thu a sawi chhuak nghe nghe a, a sawi ang ngeiin kar hmasaa a hneh loh Buranaprasertsuk lakah hnehna a chang ve leh ta a ni.

Kum 26-a upa Saina chuan, "Ka thawhrim vang-in hma ka sawn ve zel a, tun hma ka game ang kha chu la phak lo mah ila hmalam pana ka kal avangin ka lawm. Champion tumin ka inlan a, chutihrualin eng dinhmunah pawh ding ila ka pawm thiam ang," tiin a sawi.

Mipa singles-ah Swiss Open champion H.S. Prannoy chuan Chinese tlangval Qiao Bin lakah 21-16, 21-18 in hnehna a chang a, doubles-ah Rio Olympic-a India tana ilan Manu Attri leh B. Sumeeth Reddy te chu 15-21, 8-21 in Korean star Solgyu Choi leh KO Sung Hyun te ṭangdun lakah an chak lo nghal thung.