MPL5 'quarterfinal' hun a thleng ta Chanmari West Vs Chhinga Veng

Mizoram Premier League Season 5-ah Chanmari FC, Bethlehem Vengthlang FC leh Aizawl FC ten semifinal an lut tawh a, hmunruak pakhat hi zaninah hnawhkhah a ni dawn.

Chanmari West leh Chhinga Veng te zanin dar 7:00 hian Lam-mualah an inhmachhawn dawn.

West Warrior tan semifinal thleng turin draw a tawk a, MPL kaithar tan knockout stage thleng turin chak ngei ngei a ngai thung. Ssemifinal lut tura rinkai zawk sawi theih an ni lo - hei tak hi 'MPL5 Quarterfinal' ngaihnawmna chhan a ni bawk.

Nuam Nuam Nuam!

Chhinga Veng mipuiin MPL ṭantirha an au hla 'Nuam nuam nuam' tih Lammuala an au rual rual theih chhan chu Chanmari West FC an hneh vang a ni. Kelkang tlangval Lalkhawpuimawia'n West Warrior lamah hian goal hnih a khung a, MPL kaitharin I Day Football leh MFA Super Cup-ah hneh an neih loh bawk avangin he chakna hi 'Kelkang Harhna' tiha sawi a ni.

Kelkang harhnain tawp chin a nei a, MPL match riat khelh zawhah Chhinga Veng hi table mawngphahah an awm hman hial.

MPL khelh zel tumin hma an la chho a, West Warrior vanduaina chu Chhinga Veng vanneihna a ni. Coach Chawngthansanga hote tan Nigerian defender Emma Chigozie pawimawhzia sawi nawn a ngai lo a, Bawngkawn tlangval MS Dawngliana dam hnu-ah result ṭha a indawt zut mai.

MPL best forward leh top scorer ni tawh Dawngtea'n goal a khung apiangin Chhinga Veng mipuiin 'Nuam nuam nuam' tihin an lo chhawn a, Kelkang tlangval Mapuia'n goal a khung leh tawh bawk avangin Lammualah Chhingcows (Chhinga Veng
ṭantu) an tam dawn.

MPL kai-thar tana thu hriat nuam chu an player ziah luh sa Ser-vices midfielder Francis Zonun-tluanga chhawr theih turin a awm tawh a; winger ṭha H. Lalmuankima hremna hlih a ni tawh bawk.

Damna thlentu Dampuia?

Chhinga Veng kal fawr chho viau mah se Chanmari West tan draw a tawk - an dinhmun a ṭha.

West Warrior-in MPL tir aṭanga inlan tawh keeper Lalruatpuia an nei a, tlarhnungah Toky Zomuanpuia leh R. Lalawmpuia-te an chet ṭhat bawk chuan Chhinga Veng tan goal khung harsa ang.

Tlarhnung pui turin defensive midfielder ṭha Reuben Zosangpuia leh K. Lalnunzama te an awm bawk a, goal veng turin a ṭha tawk.

Chanmari West coach H.C Zarzoliana chuan, "Goal khung kan harsat lo a, goal venhim kawngah erawh tihsual kan nei leh ṭhin. Hei vang hian draw game kan khel thiang lo a, attacking game kan khel thei ang," tiin a sawi.

MPL champion hmasa ber Dinthar coach Zara'n goal khung thei Laldampuia leh R. Laldanmawia-te a neih avangin a thusawi hi a mak lo.

Chanmari West-in damna thlen turin goal riat khung tawh captain Dampuia chet ṭhat an mamawh a, Kawrtethawveng tlangval hian thlawptu a ma-mawh dawn avangin Danmawia a pawimawh ang.

I Day Football-ah West Warrior leh Chhinga Veng hi 3-3 in a inhnehtawk a, hemi ṭum hian Dampuia'n goal hnih khungin Danmawia'n goal khat a khung bawk. MPL kaithar tan 'Double D' hi ven uluk a ṭul ang. Thu lawmawm chu an striker H. Lallianzama hman theih turin a awm tawh bawk.

Kan in lawmpui tawh ang - Chawnga

Chhinga Veng coach Chawng--thansanga hi Chanmari West coach hlui a ni. Chawnga chuan, "Chanmari West mipui hi ka dinhmun chhiat ber lai pawha min ṭan tlattute an ni. Tunah erawh ka hna a nih avangin Chhinga Veng chak theih nan theihtawp ka chhuah dawn a, chak ngei pawh kan tum. Kan chak a nih chuan Chanmari West mipuiin min lawmpui ngei ka beisei a, ka chak lo a nih chuan ka thinlung takin ka lawmpui thung ang," tiin infiammi thinlung pu chunga inkhel a thlir thu a sawi.