MPL5 Relegation Playoff khel tur Dinthar nge Ramhlun North?

Ramhlun North-in Mizoram Pre­mier League an khelh hmasak berah Zosangliana (Chhaia) goal hmangin Dinthar FC 1-0 in an hneh a, MPL kaithar hian champion hmasa ber hi an hneh nawn a nih chuan Dinthar tan MPL khel zel turin relegation playoff an khelh a ṭul ang.

Vawiin tlai inkhel pawimawh bik hi sawn tlai hret a ni a, tlai dar 4:00-ah khelh a nih dawn avangin entu lam tan pawh Lammual pan a harsa lo ang.

An dam tawh

Ramhlun North-in Armed Veng South tlangval Chhaia leh C. Ramdinmawia tel loin match hnuhnung pahnih an khel a, Zo United an draw bakah Chanmari FC an hneh lo. MPL kaithar hian Zo United hi hneh se him mai tawh tur an nih laiin point khat chauh an hmuh avang leh head to head-ah an tluk loh avangin Dinthar laka point an hmuh loh chuan tla thei an ni.

Lalruatliana Sailo hote tan match pawimawh bik a ni a, playmaker Chhaia leh defender Ramdina dam hian team phurna nasa tak a pe ang. Ramhlun North hian Santosh Trophy best player ni tawh Ramniengmawia leh India junior team tana inlan tawh Lalramzauva Khiangte te an neih belh a, Tuikual North tlangval Lalremruata chhawr theihin a awm tawh bawk. Dinthar huphurh ber tur erawh Nigerian striker Oneyeama Francis a ni ang.

Venghlui FC aṭanga an lakluh Rem­ruata, Chanmari aṭanga an lakluh Isaac Lalruat­puia leh Nigerian forward Francis ten Ramhlun North tana an match hmasa berah goal an khung vek a, goal hi relegation playoff pumpelh tura an mamawh chu a ni.

Dinthar lam ve thung

Season ṭantirh aiin Ramhlun Norh an ṭha tawh zawk a, Dinthar harhtharna chan a la sang cheu. MPL1 champion hian Nigerian defender Balogun Hammed leh midfielder Clarence Carter bakah Cho Tshering Lepcha an neih avangin semifinal luh beiseina an nei hman hial a; amaherawhchu an match hnuhnung bera Chhinga Veng an hneh loh avangin tla thei dinhmunah an ding leh tawh.

Dinthar coach Lalhlupuia Sailo chuan, "Samuel-a, Ruatpuia, Michael leh Cho te an khel nghal vek ang. Draw game khel turin kan inbuatsaih lo," tiin draw a him lo tih a hre chiang hle. Phase 2-ah Dinthar inkhelah goal hnih aia tlem a lut ngai lo a, chuvangin vawiin tlai inkhel pawh hi a hmuhnawm dawn.

Lalhlua tana thu lawmawm lo chu mid­fiel­der pawimawh Lalbiaknia hrem vangin a inlan thei dawn lo a, Ramhlun North lamah winger David Lalrinchhana chu inhliam vangin a inlan thei bik lo ang.

Engtin zel?

Ramhlun North coach Lalruatliana Sailo chuan, "Playoff khelh loh theih hram hi chu kan duh. Rilru dik kan put chuan, I Day Football ang khan ṭha takin kan khel thei ang. League round bika kan match tawp ber a ni thei a, Ramhlun North mipui ṭawiawmna kan ngen tak meuh meuh a ni," a ti.

MPL kaithar hi kumin I Day Football finalist an ni tih hriat a ṭul a, khami ṭum ai khan an squad an chhah tawh zawk. Dinthar tan hmun him pan hi a awlsam dawn lo a, Ramhlun North mipui an thawk chhuak dawn tih hi a chiang a ni.

Dinthar FC tluka tlo hi Mizo club zingah an awm chuang lo a, tun ṭum­ah hian an veng pa Lalhlupuia Sailo chu coach a nih bawk avangin inkhel pawi­mawhah hian Maimawms an tam ang.

MPL-a pasarihna hian MPL Qualifier-a pahnihna nen playoff an khel ṭhin a ni.

Inkhel Nghawng

• Dinthar chak - Dinthar an him, Zo United-in relegation playoff khel turin beisei an nei ang, Ramhlun North tla thei dinhmunah an ding ang.

• Draw - Dinthar an him, Ramhlun North - relegation playoff, Zo United an relegate.

• Ramhlun North chak - Ramhlun North him, Dinthar - relegation playoff, Zo United an relegate.