Arsenal-in PSG lakah hun tha bawhpelh

Champions League Group A hmahruaitu nih inchuhna inkhelah Arsenal-in an mikhual Paris St-Germain lakah an hun
ṭha neih an chhawr ṭangkai thei lo. Nilaini zan inkhelah Alex Iwo-bi-a'n minute 77-naa an lama a tih luh vangin 2-2 in an inhehtawk.

Arsenal hian match nga khelh aṭangin point 11 an hmu a, table-ah pahnihna an ni. French champion PSG hian point 11 ve tho hmuin an goal difference ṭha lo zawk mah se team pahnih intawn tawhna en hmasak anih avangin away goal rule hmangin an chungnung zawk. Club pahnih te hi first leg-ah 1-1 in an lo inhnehtawk tawh - khualmuala goal khung hnem zawk PSG an chungnung.

Intiat tawk

Emirates Stadium-a in-khelah first leag-a goal hmasa khungtu Edinson Cavani bawk-in minute 18-naah PSG hma a hruai pui leh. Arsenal-in Olivier Giroud-a penalty leh Marco Verratti own goal hmang-in an lehthal a, harsa lutuk loin group hmahruaitu an ni tura ngaih a ni. Goal an phurh hnuah PSG an hlauhawm zui a, hun tawp hma minute 13 chauh awm tawhah Lucas Moura ball tauh chu Iwobi-a'n an lamah a ti lut.

Arsenal leh PSG te hian goal khung tumin an khingpui goal zawnah ṭum khat chauh an pet thei a, a goal ve ve! Kum 2009 October thla khan Rangers leh Unirea Urziceni te inkhelh ṭumin own goal vawi thum ngawt a lo awm tawh a, he mi hnuah tun ṭum hi Champions League match bika 'shots on target' aia goal a tam leh hmasak ber
ṭum a ni.

Ze ngai bawk?

Gunners hian a zawnin season 14 chhung zet chu Champions League knock out stage an lut ta a, record duhawm tak a ni. Chu-tihrualin a chhuanawm loh lai chu tun hnai season ruk chhungin last 16 an paltlang miah lo. Kum dang ang bawkin group danga hmahruaitu an hmachhawn leh dawn niin a lang a, an ze ngai bawk chhuaha last 16-a chak lo thei dinhmunah an ding.

Chutihrualin group match khelh hmabak pakhat ṭheuh an la nei. Arsenal hian Swiss club Basel an lenchilh dawn a, hnehna an chang anih pawhin hmahruaitu an nih leh nih loh chu PSG leh Ludogorets te inkhel result-ah an innghah a
ṭul tawh ang.

Arsenal tana inhnemna tur pakhat erawh chu pahnihna an ni a nih chuan tun hnaia ṭum hnih an ngam loh tawh Bayern Munich an pumpelh dawn chiang. German champion hi Group D-ah Atletico Madrid tluk loin pahnihna an ni chiang tawh a, nizan inkhel result a zirin Real Madrid an pumpelh thei bawk.

Fak tlak Cavani

Zlatan Ibrahimovic chhuah hnuah PSG-in striker thar an lalut lo a, manager Unai Emery-a'n an neih sa Cavani a ringtawk. Uruguay international hian Champions League bikah English club vawi 14 a hmachhawnah goal riat a khung. Season kal meka inelna hrang hrangah a club tan goal 16 khung tawhin a tluk loh chu goal 18 khung thei Lionel Messi chiah a ni.

PSG hian an match hnu-hnung berah hnehna an chang a nih chuan group hmahruaitu an ni chiang dawn. Laurent Blanc kaihhruaina hnuaiah PSG-in a zawnin kum li chhung Champions League quarterfinal an lut vek, hei aia sang erawh an thleng thei bik lo. Kuminah hian hmahruaitu an ni tlang thei a nih chuan season liam taa an tluk loh Barcelona an pumpelh ang - Catalan club hi Group C hmahruaitu an ni chiang tawh.

Eng nge an sawi?

Arsenal manager Arsene Wenger chuan, "Kan bench a chhah tawh a, a hnufual zawk kan nih hnuah pawh kan lehthal thei a ni tih hi tun season chhungin kan lantir fo. October leh November thla hian kan tan inkhel hautak a tam thu ka sawi lawk tawh a, tunah match 18 chhung chak loh nei loin kan kaltuang thei. Kan duh leh tum ber point thum hmu lo mah ila chiaina tur a awm lo," tiin a sawi.

PSG manager Emery chuan, "Hmahruaitu nih theih hi a hluin a ṭha hle, kan hun ṭha neih remchan berah goal kan khung a, chumi hnuah kan chhuah leh bawk. Inkhel pumpui thlir kha chuan 2-2 nih kha a awm reng, kan intiat tawk hle," tiin a sawi.