Ibra tan contract thar a hnai

Manchester United manager Jose Mourinho chuan an striker Zlatan Ibrahimovic chu kum khat dang cham chhunzawm tura contract thar zawrh an tum thu a sawi. Kum 35-a upa striker hian nipui transfer bazar lai khan free transfer-in United hi a zawm a, kum khat atan contract ziakin a ṭul dan a zira kum khat dang pawhsei theih tura ruahman a ni.

Mourinho chuan, "Ibra hi kum khat dang cham tura contract thar zawrh kan tum a, thutlukna chu ama kutah a awm ang," tiin Sweden tan vawi 116 inlana goal 62 khungtu striker chungchang a sawi.

United-a zawm hnua match 17-a inlana goal riat khungtu striker chuan, "Ka theihna ngai reng ka la nei a, nuam ka tiin ka hlim a, tuna ka awm anga ka awm reng chuan a kum hnih nan United-ah min hmu ang," tiin a sawi ve bawk.

Ajax, Juventus, Inter Mi-lan, Barcelona, AC Milan leh Paris St-Germain striker hlui hian kum 2001 hnuah nomawi chawi loa season hman a nei ngai lo a, heng zingah hian league nomawi 13 lai a tel.

Swedish striker ropui hian khelmual chhungah beisei angin United la hlawhtlinpui lo mah se Thawhṭanni khan Sweden khawpui Stockholm-ah a lim din a nih tur thu a zawna kum 10 nana Swedish Player of the Year chawimawina a dawn hnu lawkah puan a ni.

Swedish Football Asso-ciation president Karl-Erik Nilsson-a'n an ram football tan tha a thawh hnem vanga a lim an dinsak tur thu a sawi Ibra chuan, "Ka tan chuan a ropui thlawt a, mi tam zawk chu an thih hnuah chauh an lim din a ni ṭhin," tiin a dam lai ngeia chawimawi a ni chu a lawm hle.