Drogba-a'n Montreal a chhuahsan dawn

Chelsea legend Didier Drogba chuan MLS season tawp rualin a khelh mekna Montreal Impact a chhuahsan tur thu a sawi. Kum 38-a upa striker hian Nilaini zinga Eastern Conference finals first leg-a 3-2 a Toronto FC an hneh hnuah he thu hi a sawi a ni.

Kum 2015-a Chelsea aṭanga Montreal zawmtu striker chuan, "Match khat emaw match hnih khelh kan la hmabak a, karleh inkhel tur hi ka hun tawp ber pawh a ni thei," a ti a, Montreal hian second leg-ah hnehna an chang a nih chuan MLS Cup final an lut ang.

Ivory Coast international hlui hian MLS a pan hnuin Montreal tan match 33 khelin goal 27 a khung a, Marseille, Galatasaray leh Shanghai Shenhua tan pawha lo khel tawh striker hian club dang a zawm dawn leh dawn loh a sawi lo thung.

Tun hnaiah MLS player langsar zingah US chhuahsan an tam hle. Frank Lampard-a'n New York City a chhuahsan tur thu a puan hnu lawkah Steven Gerrard-a'n LA Galaxy a chhuahsan tur thu a puang a, MLS-a sulhnu nei ropui ber pawl Robbie Keane chuan Gerrard hnungzui ve lehin tunah Drogba-a'n a chhuah tur thu a puang ve leh ta.