Russia khaw vawtin Bayern hmet khawng

25th November, 2016

Nilaini zan khan Carlo Ance-lotti kaihhruai Bayern Munich chu Russia khaw vawtin a hmet khawng. Bundesliga champion hi FC Rostov lakah 3-2 in an tlawm; an inkhelhna hi -5 degrees celsius zeta vawi a ni. Inkhel dangah Atletico Madrid chuan PSV lakah 2-0 a hnehna changin group hmahruaitu an ni chiang.

Bayern an buai

September thla khan Alianz Arena-ah Bayern hian 5-0 in Rostov hi an sawp. Second leg-ah pawh hian chak zawk tura rinkai an ni. Mahse, khaw vawt vanga club tam tak an lo talbuai tawhna hmunah Bayern an buai a, minute 36-naah Douglas Costa hmanga goal hmahruai khungin Bernat-a'n khung ve bawk mah se Russian club hian Sardar Azmoun, Dmitry Poloz leh Christian Noboa te hmangin an chhanglet.

Bayern Munich hian Bundes^-liga a an match hnuhnung pahnihah point khat chiah an hlawh chhuak a, an match hnuhnung berah Dortmund 1-0 in an hneh lo. Tunah vawi nga an champion tawhna Champions League lamah result ṭha lo a neih chhunzawm a, Italian manager-in a season tirah bulṭan ṭha viau mah se hun harsa a tawng mek.

Italian manager Ancelotti chuan, "Hnehna chan tumin Rostov kan hmachhawn a, kan hlawhchham. Kan result aṭanga ka zir chhuah chu kan chesual zeuh anih chuan kan khingpui ten min hrem nghal zat zel a ni tih hi a ni. Inkhel hautak kan hmachhawn zui leh dawn a, chawl hahdam hman kan ni lo, kan inbuatsaih chhunzawm nghal ang," a ti. Bayern Munich hian Inrinni zanah Bayer Leverkusen an hmachhawn leh nghal ang.

Atletico an tho

La Liga-ah Real Madird 3-0 ngawta an hneh loh hnuah Atletico Madrid an tho lehnghal. Diego Simeone-a naute hian Antoine Griezmann leh Kevin Gameiro te goal hmangin Dutch club PSV 2-0 in an hneh. Atletico hian tun season Champions League group match an khelh pangaah hnehna an chang vek a, anni chiah hi chak vek chunga last 16 lut thei an ni.

Atletico manager Simeone chuan, "Gameiro khan goal khung turin theihna a neihsan zia a tilang. A tlan chak a, tharum a ngah bakah a finishing kha a ṭha hle. Champions League-a a goal hmasa ber a khung ta a, ani leh team tan a ṭha hle. Griezmann sawi hmaih theih a ni lo a, ani hi chu engtiklai pawha kan player pawimawh berte zinga mi a ni," tiin a team tana goal khungtu pahnih a fak.