Napoli tan nghah a la ṭul

Italian club Napoli chuan an mikhual Dynamo Kiev chu goal khung loin inhnehtawkpui mah se Besiktas-in Benfica laka point hlawh chhuak tura comeback ropui an lantir avangin Group B aṭanga Champions League last 16 lut tur ala chiang thei lo.

Napoli hian hnehna an chan chuan last 16 an lut thei tih hriain Jose Calle-jon, Dries Mertens, Lorenzo Insigne leh Marek Hamsik-te hmangin goal khung tum viau mah se Ukrainian club tlarhnungah Yevhen Khacheridi leh Doma-goj Vida te inkawp an paltlang hleithei lo a, goalkeeper Artur Rudko chuan Dynamo hi vawi tam a chhanhim bawk - Ukrainian club hian tlarhnung veng ṭha mah se goal an khung theih bik loh avangin Group B-a club pali zingah beisei tur nei tawh lo awmchhun an ni.

Inelna hrang hranga an match hnuhnung 10-a vawi thum chiah hnehna chang thei Napoli hian an group stage match hnuhnung berah Benfica laka point an hlawh chhuah chuan last 16 an lut ang. Portuguese club Benfica hian an mikhualna ramah minute 31 chhungin 3-0 in hma hruai hman mah se tlawm duh lo Besiktas second half harhtharna an chelh zo lo a, 3-3 in an inhnehtawk.

Benfica hian first half-a Goncalo Guedes, Nelson Semedo leh Ljubomir Fejsa goal khung hmangin hnehna an chang ngei dawn niin lang mah se chawlhlawk hman laiin Besiktas-in thu
ṭha an ngaithla tih a chiang a, Cenk Tosun, Ricardo Quaresma leh Vincent Aboubakar hmanga an si phurh sut zo vekin beiseina thar an insiam ve leh a ni - Turkish club hian an match hnuhnung bera Dynamo an hneh chuan last 16 an lut ang.