I League a buai zual zel Sporting Goa an inhnukdawk
Indian football hmabak a thim tawlh tawlh - Goan club hlun Sporting Clube de Goa chuan season tharah I League khelh an tum lo tih an tichiang a, 2nd division champion Dempo SC dinhmun a chiang lo bawk!
I League-a inlan tur tan November 22 thleng khan All India Football Federation (AIFF)-ah inhriattir tur a ni a, Goan club pahnih hian engmah an thehlut lo.
Sporting Goa chuan thu-chhuah siamin, "AIFF-in a kalphung thlak tumna a neih loh avanga inhnukdawk kan ni. Sporting Goa hi I League-ah inlan dawn lo mah ila he club hi chu a kal reng dawn a, Goa mai bakah India ram hmun hrang hranga inelna danga inlan turin team ṭha leh chak tak din kan tum tho a ni," tiin I League-a khelh loh chu an club tawpna tur a nih loh thu a sawi.
Engvangin nge?
AIFF-in kum 2014-a khelh ṭan Indian Super League chu kum 2018 aṭang chuan India rama league sang ber nihtir an tum a, hun rei tak chhung sum hloh pawh inhuama I League khel ṭhin club-te chu League One khel tura tih an ni thung. AIFF ruahmanna ang chuan hun engemaw chhung chu ISL club an relegate thei lo ang a, League One club tan ISL-ah kaisan theih a ni lo bawk ang!
He ruahmanna puanzar a nih hma daih tawh hian Bharat FC, Royal Wahingdoh leh Pune FC-te chuan AIFF ruahmanna hi an hre ru a, I League aṭanga inhnukdawkin a thlawna sum sen reng an duh lo.
AIFF-in an ruahmanna an puan rualin Salgaoacar chu I League aṭangin an inhnukdawk a, tunah Sporting Goa an inhnukdawk ve leh ta- Dempo-in an zui hmel.
Club thil phut
AIFF-in Indian football kal-phung thar a duan danah chuan league sang ber ni tur ISL hi No-vember 2017 aṭanga khelh ṭan turin an ruahman a, nakkum January-ah I League ṭanin India rama football league sang ber a nihna a hloh tawh ang - club tan I League khelh hi sum hloh thlawnna a ni a, awmze nei lo mai a ni.
Indian FA-in kalphung thar a duan rual khan Sporting Goa hi Salgaocar nen an lo inhnukdawk tawh a, mah se AIFF hruaitute nen an inhmuhkhawm hnuah Spor-ting Goa hian AIFF an ngaichang leh phawt a, Salgaocar erawh an dinna ngaiah dingin I League khelh an tum loh chu an kaltlangpui.
Goan club te hian AIFF hnen-ah thil phut an nei a, I League chu second division-a tihhniam loh te, I League club tan ISL-a tel tura franchise fee chawi loh te, rorelna kalphung zawng zawng AIFF hnuaia a awmte a ni.
A der mai maw!
Sporting Goa-in AIFF laka an thil phut a hlawhtling dawn emaw an ti a, mah se rei tak an nghah hnuah pawh AIFF aṭangin thuthar engmah an dawng tawh lo a, duhthlan tur pahnih an neihah sum sen thlawn ai chuan inhnuhdawh an thlang ta zawk.
Goan club chuan, "FIFA, AFC leh AIFF president-te thusawi bakah FIFA leh AFC lama kan thu thlente behchhan chungin rei tak kan nghak a, AIFF hian ruahmanna a lo neih tawhte chu thaichhiain thuthar a nei dawn emaw kan ti a, mah se tunah chuan kan beiseina chu awmze nei lo mai a ni tih kan hriat tawh avangin inhnuhdawh mai loh chu duhthlan tur kan nei tawh lo a ni," tiin thuchhuah an siam.
Dempo dinhmun
Season hmasa 2nd division-ah Dempo SC an champion a, season tharah I League khel tura tih an ni. Mahse Salgaocar FC leh Sporting Goa-in AIFF thuchhuak awm tirha I League aṭanga an inhnuhdawh tur thu an puan khan Dempo chuan Goan club pahnih hian I League an khelh dawn loh chuan khelh bik an tum loh thu an lo sawi tawh.
Sporting Goa an inhnukdawk chiang a, Dempo chuan, "Tun
ṭumah chuan thuchhuah siam tur engmah kan nei lo. Kan dinna ngaiah erawh kan la ding reng a, AIFF hian kan thil phutte kha an ti hlawhtling dawn lo a nih chuan sum tam tak sen a
ṭulna a awm lo. Hmasawn turin team kan din a, a hnuai lama tla thla tur kan ni tih inhre sa chunga sum sen kan tum lo," tiin an sawi a, an inhnuhdawh ve ngei a rinawm hle.
Team thar pathum?
AIFF-in Salgaocar inhnuh-dawh avang khan I League-a hmun ruak awm chu an lo zuar tawh a, tun dinhmunah I League khelh beiseiin FC Bardez, Minerva Academy FC leh Chennai City FC ten dilna an thehlut tawh.
Club dang an inhnukdawk ve a nih chuan AIFF hian tum loh deuhin club pathum dilna hi a pawm vek pawh a ngai zawk hial mai thei. Nimin khan dilna lo lutte ngaihtuah turin AIFF hotute an ṭhukhawm a, he thu ziah lai hian an thutlukna hriat hman a ni lo.
Tun dinhmuna I League khel tur chiang club te chu Aizawl FC, DSK Shivajians, East Bengal, Mohun Bagan, Mumbai FC, Bengaluru FC leh Shillong Lajong te chiah an ni.