Hamilton tan beisei a la awm

Pathianni hian kumina Formula 1 intlansiak hnuhnung ber tur Abu Dhabi Grand Prix chu Yas Marina Circuit-ah tlan a ni dawn a, champion lai Lewis Hamilton tan hmahruaitu Nico Rosberg lehthal turin kawng a la awm.

Tun season-ah intlansiak 20 an neih tawh aṭangin Mercedes driver Rosberg-a'n point 367 hmuin hma a hruai mek a, a vawi khat nana world champion ni turin beiseina a nei sang hle. Hetihlai hian Hamilton tan beisei bo vek a la ni bik lo, a teammate a phak lohna hi point 12 chiah a ni a, kawng a la ping vek lo.

German driver Rosberg hi pakhatna a nih chuan a champion dawn chiang a, intlansiakah hian pakuana chin pawh ni se Hamilton tan pathumna tal nih a ṭul.

British driver Hamilton chuan, "Ka beidawng ve ngai lo a, a tawp thlengin ka bei ṭhin. Intlansiak dang ang bawkin ṭha takin tlan ka tum dawn a, ka theihtawp ka chhuah dawn - a bak chu ka tih theih a awm tawh lo ang," tiin a sawi.

Kuminah Mercedes hian For-mula 1 inelnaah ro an rel hneh hle a, an driver pahnih Rosberg leh Hamilton te hian vawi kua ve ve hnehna an chang tawh. Anni pahnih tih lohah chuan Max Verstappen leh Daniel Ricciardo te chiah hnehna chang thei an awm.