Dinthar-in MPL khel zel dawn Ramhlun North dinhmun a derthawng

Mizoram Premier League champion hmasa ber Dinthar FC-in nimin tlai khan Ramhlun North 1-0 in an hneh a, Mizoram football inelna sang ber an khel zel dawn - MPL5-ah parukna an ni.

MPL kaithar Ramhlun North erawh Bethlehem Vengthlang kutah an innghat a, zanin dar 7:00-a BVT-in Zo United laka point an hmuh chauhin relegation playoff an khel ang. Reitlang hming pu ṭhin Zo United hian hnehna an chan erawh chuan Lalruatliana Sailo hote hi MPL aṭangin an relegate dawn.

A goal lo

Dinthar FC-in an dinhmun an hre chiang a, an theihna zawng zawngin an nawr ngam lo. Ramhlun North lamin goal chhuah pawi zia an hriat bawk avangin first half a nung tawk lo - goal chance erawh a tam hle.

Nigerian defender Balogun Hammed-a'n hla tak aṭang-in MPL kaithar keeper Liansang-puia a fiah nghal a, Ramhlun North-in an chhu let nghal. Mid-fielder Zosangliana (Chhaia) ball fing chu Jerry F. Zonunsanga'n a hmang ṭangkai thei lo. Hemi hnu lawka Chhaia freekick pet chu a goal teuh hle.

Ramhlun North keeper Lian-sangpuia'n Dinthar for-ward Cho Tshering Lepcha leh Michael Lalremruata goal khung tur a dang. MPL kaithar Nigerian forward Francis Onyeama ball petin defender a per hnuah goal pawnah chiah a kal a, halftime a ni zui bawk.

Chak duh Ramhlun N

Lalruatliana Sailo-in chak a tum tih a thutlukna hmangin a lantir a, first half-a khel ṭha lo Vanlalthlamuana aiah Isaac Lalruatpuia luh tirin inkhel a nung sawt. Minute nga hnu lekah Ramhlun North midfielder Chhaia'n hnai tak aṭangin goal-ah a pet a, defender a per hlauh avangin Dinthar keeper Isak Lalmuanpuia a him hlauh.

Chhandamtu Michael

Chak turin Ramhlun North an dinhmun a ṭha zawka a lan laiin Dinthar hun a inher chhuak a, minute 71-naah Michael Lalremruata'n a tauh goal. Dintharin goal an khung theih nan an veng tlangval Samuel Laltlanthanga corner pet chu Michael-a'n ṭha zetin a tauh lut.

Dintharin goal khung an ngeih a, Maimawms thawm a ṭha sawt bawk. MPL cham-pion hmasa ber Dinthar tawn-hriat ngahna a lang a, foreigner Balogun Hammed leh Clarence Carter an ṭangkai bawk avangin an talbuai lo.

Khatla tlangval Michael-a hian tun season-ah goal riat a khung a, minute 129 danah goal khat khung zelin MPL season a hman ṭhat ber ṭum a ni.

Lalhlua a hmelṭha

Dinthar mipuiin an coach Lalhlupuia Sailo chungah an lawm tih lantir an 'Lalhlua i hmelṭha, bus-ah i chuang dun ang' tiin Lammualah an zai rual a. Inkhelh bana inkawmna neih zawh chiahin Lalhlua hi Dinthar mipuiin an zawn bawk - dinhmun chhe ber aṭangin hmun himah a hruai a, team
ṭha tak a din a ni.

Dinthar FC coach Lalhlu-puia Sailo chuan, "MPL-a relegate loh hi kan tum a, kan tum kan tih hlawhtlin avangin ka lawm takzet a ni. Pathian zarah tun dinhmun kan thleng a, keima tih ni loin Dinthar FC hruaitute leh vengchhung mipui thawhrah a ni," tiin Vanglaini palai a hrilh.

Tute nge inlan?

Ramhlun North FC (4-4-2) : Liansangpuia; Israel Laldingngheta (Ramniengmawia 87'), C. Ramdinmawia, Lalramthlamuana, Lalmuanawma; Vanlalthlamuana (Isaac Lalruatpuia 46'), Zosangliana Lalramzauva Khiangte (Lalchhuanpuia 87'), Jerry F. Zonunsanga; Francis Onyeama, Lalremruata.

Dinthar FC (4-3-3) : Isak Lalmuanpuia (Joseph C. Lalruatfela 62'); Steve Lalnunmawia (Vanneihtluanga 55'), Balogun Hammed, VL Chhanhima, Zothanzuala; Clarence Carter, Saihmingthanga, Samuel Laltlanthanga; Lalruatpuia, Michael Lalremruata (R. Lalnunmawia 90+4'), Cho Tshering Lepcha.

ZoFooty Statistics

Ramhlun North FC 0 - 1 Dinthar FC

DFC : Michael Lalremruata 71'

MoM : Michael Lalremruata, DFC

52% Ball Possession 48%

12 Shots 18

1 On Target 9

1 Yellow Cards 1

0 Red Cards 0

Powered By Rainbow Multibrand

Mobile Showroom