Zaninah MPL aṭanga tla tur chiang dawn

Mizoram Premier League Season 5-ah league round bikah match hnih chauh khel tur a awm tawh chungin tla tur a la chiang lo. Zanin dar 7:00 hian Zo United-in semifinal lut chiang tawh Bethlehem Vengthlang FC an hneh chuan Ramhlun North an relegate dawn.

Nimin tlaiah ramhlun North hian 0-1 in Dinthar FC an hneh lo. he result hian Zo United a tinung thar. Point 9 hmu tawh Zo United hian head to head-ah point 12 hmu Ramhlun North hi an hneh avangin zanina an chak chuan pasarihna an ni ang - MPL pasarihna hian MPL qualifier-a pahnihna nen play off an khel ve leh ang.

Relegation Battle

MPL-ah Zo United aia relegation battle-ah tawnhriat nei ngah an awm bik lo a, kum nga chhung Mizorama football inelna sang bera an tel theih avangin an hlawhtling zel tih chu tlang hriat a ni.

MPL1-ah Reitlang hi parukna an ni a, round hnu-hnung berah FC Kulikawn an draw mah se an elpui Luangmual FC leh FC RS Annexe ten an khingpui Chanmari FC leh Dinthar FC an hneh loh avangin Reiek club hi an him.

MPL2-ah Reitlang FC hi parukna tho an ni. Tla tura rin an nih hnuah match hnuhnung ber awm tawh a zawnga ngaihnawm ber ang hiala sawi theih an khel - Reiek club hian an match hnuhnung berah Chanmari West 2-1 a lehthalin MPL khel zel theihna ticket an nei.

MPL3-ah Reitlang FC an talbuai a, amaherawhchu anni aia chefuh lo Lunglei FC an awm avangin playoff khel thei dinhmunah an ding tho. Pasarihna niin Relegation Playoff-ah Upper Republic FC an hneh a, MPL khel zel thei dinhmunah ding mah se Reiek club tawpna niin Zo United tiin a hming thlak a ni.

Zo United hming an put hnua MPL an khelh hmasak berah semifinal an lut a, champion zui ta Aizawl FC an hneh lo. MPL5-ah erawh an result ṭha chhunzawm thei loin phase 1 thlengin semifinal khel thei dinhmunah ding mah se round tawp berah erawh tla thei an ni.

Hmabak hautak

Zo United-in match hnu-hnung bera inhliam defender Malsawma Chhangte leh red card hmu forward Jesse Laldinpuia te an chhawr theih dawn loh bakah midfielder Laldinmawia a inhliam a la dam lo. Amaherawhchu Chanmari West an draw ṭumin Zo United rilru huaisenna a lang a, inkhelh bana man of the match-a thlan Lalnunpuia Pachuau-in, " Kan vaiin kan match hnuhnung berah kan attack ang," tiin a sawi bawk avangin inkhel a nung dawn tih a chiang.

Zo United technical director James Khamlian-sawma pawhin, "Ramhlun North hi relegate turin ka duh bik lo a, amaherawhchu kan hna ṭha taka kan thawh a ṭul si. Ka nauten theihtawp chhuahin an khel ang," tiin MPL khel zel turin BVT hneh ngei an tum thu a sawi.

BVT an ṭha

Bethlehem Vengthlang FC hi pathumnaah an tla thla thei tawh lo a, pakhatna emaw pahnihna erawh la ni thei an ni. Champion ngei an tum avangin MPL2-a Chan-mari FC captain Zo-than-puia chu loan hmangin an lalut a, captain Laldingngheta a dam tawh bawk.

BVT coach Lalbiaksanga Colney chuan, "Kan thil duh a la ngai reng, kan duh chu chak a ni. Semifinal-a kan tum theih tur lam kan ngaihtuah lo a, field chhunga hnehna chan hi kan duh a ni," tiin chak chunga semi final khelh an duh.