Messi-a'n Ronaldo record a hnaih

Celtic Park-ah Barcelona-in Lionel Messi goal hnih hmangin Celtic 2-0 in an hneh a, Scottish club hian European competition-ah beisei tur an nei tawh lo.

Argentina captain Messi erawhin tun season Champions League-ah goal 11 a khung tling der a, tun season match 15 a khelh aṭangin goal 18 a khung tawh bawk. Barcelona forward Messi hian UCL bikah goal 92 a khung tawh a, Cristiano Ronaldo a phak lohna chu goal thum chauh a ni. UEFA hnuaia club competition hrim hrimah Ronaldo hian 98-95 Messi lakah hma a hruai mek bawk.

Nilaini zan inkhelah Catalan club-in minute 24-naah goal an khung a, Neymar ball fing leh Messi finishing class chu Celtic tlarhnung tan dan theih rual a ni lo. Goalkeeper Craig Gordon-a'n Barca forward Luis Suarez tauh chu ṭha zetin a dang a, minute 55-naa Messi penalty erawh a dang thei bik lo.

Brendan Rogers hote hian Barca hi 7-0 in Nou Camp-a an hneh tawh loh avangin chak lo mah se an result-ah hmasawnna hmuh tur a awm. Chutihrualin point an hmuh miau loh avang leh Borussia Monchengladbach aia head to head-a an ṭhat loh zawk avangin pathumna an ni thei tawh lo a, Europa League an khel thei tawh lo tihna a ni bawk.