City-in knockout stage an lut

Pep Guardiola kaihhruai Manchester City-in David Silva goal hmangin khualmualah Borussia Monchengladbach 1-1 in an draw a, UEFA Champions League knockout stage an lut.

Nilaini zan inkhelah City-in point khat chauh an hlawhchhuah avangin Group C hmahruaitu Barcelona-an umpha thei tawh lo a, pahnihna an ni chiang tawh.

Goal leh Red Card

Borussia Park-ah Raffael-a'n minute 23-na lekah box chhung chiah aṭangin Gladbach hmahruaina goal a khung a, City-in half time hma hretin an sut. Belgian midfielder Kevin de Bruyne cross chu Spanish mid-fiel-der Silva-a'n a tlawh goal.

Second half-ah Raheem Sterling-a goal khung offside vangin pawm a ni lo a, minute 51-na lekah Gladbach capatain Lars Stindl-a'n yellow card vawi hnihna hmuin hnawhchhuah a ni. City-in tam zawk an nihna an hmang ṭangkai lo a, minute 63-naah Fernandinho-a'n ṭul lo takin Raffael kawr a pawt a, Brazilian midfielder hian yellow card vawi hnihna hmu chiahin team pahnih player 10-in an khel tluan.

City an ṭha em?

Manchester City hi kum 1970 khan UEFA Cup Winners' Cup-ah an champion a, Spanish manager Pep Guardiola an lakluh chhan chu Europe club-te tana inelna sang ber Cham-pions League champion a ni.

Pep-a hoten Barcelona an hneh khan champion turin an ṭha tawk a tih theih a, amaherawhchu inkhel pawimawhah Bundesliga 14-naa awm Monchengladbach lakah point thum an hlawh chhuak thei lo. City hian ball chang tam mah se goal khung theihna tur hun ṭha bik an insiam hlei thei lo a, an khelh danah Spanish manager a lungawi thlap lo ang.

City playmaker De Bruyne-a'n ball a chanin a thiam tih a lang a, ball erawh a chang tam tawk lo. Liverpool midfielder hlui Raheem Sterling pawh mamawh hunah a ṭangkai tawk lo, chutihrualin Pep-a naute buaina tak erawh tlarhma ni loin tlarhnung a ni.

English club ṭha City hian match li chhung chu clean sheet an nei tawh lo a, October 29-a West Brom lakah goal an chhuah lo a, hemi hmaa clean sheet an neih chu September 17-a AFC Bournemouth an hneh ṭum a ni leh daih bawk.

Pep a lawm

Manchester City manager Pep Guardiola chuan, "Game khat khelh tur la awm chunga last 16 kan lut hi a lawmawm. Knockout stage kan lut chiang tawh a, February thlaaah knock-out stage khelh tur a nih chauh avangin Premier League-ah kan insawrbing tawh ang," tiin an result-ah a lungawi thu a sawi.

Spanish manager Pep chuan hmasawnna an neih thu sawiin, "Player tam tak hi Europe inelnaah mi thar an ni a, hmasawnna tur kan la ngah hle a ni," a ti.

City hian Inrinni zanah 12-na Burnley an hmachhawn dawn a, hemi hunah chuan Champions League squad-a tel lo Yaya Toure a khel thei tawh ang.