Euro 2020 Group khatah Germany, France & Portugal

UEFA Euro 2020 draw chu Inrinni zan khan Bucharest-ah neih a ni a, group of death-ah inhnialna tur a awm lo. Group F-a Portugal, France leh Germany te awm kawp chu group ṭha ber an ni a, ram pakhat la awm tur hi path A aṭanga rawn kal thei a nih avangin ram ṭha zingah knockout stage thleng lo an awm thei tihna a ni.

Gareth Southgate-a kaihhruai England chu Croatia leh Czech Republic te nen an awm kawp a, Ryan Giggs-a enkawl Wales chu Turkey, Italy, leh Switzerland te nen an awm ho bawk. Group F team ṭha pathum zinga nem bera ngaih Portugal hi Euro champion lai an ni a, Cristiano Ronaldo telna a ni. Tun hnaiah bik chuan France aia record nei ṭha an awm lo a, Euro 2016-ah final an luh bakah FIFA World Cup-ah an champion.

Les Bleus coach Didier Deschamps chuan, "Group harsa tak a ni. Joachim Low leh Fernando Santos te pawhin min ṭawmpui ang. Kan fixture hi kan thlir chuan kan hmabak hi a hautak hle. Match hmasa berah Germany kan khel dawn a, Munich-ah kan inhmachhawn dawn," tiin a harsat tur thu a zep lo.

Germany coach Joachim Low chuan, "World champion leh European champion lai nen kan inkhel dawn a, mipui ngaihven inkhel kan chang hi ka lawm. Chutihrualin thlirna dangah chuan khingpui a awlsam theih nan qualifier-ah rim takin kan thawk a, hei hi kan chan chu a ni si," tiin lawmna tur awm mah se chetsual theih a nih thu a hrechiang hle.

Euro 2020 hi June 12-ah khelh ṭan a ni ang a, tun ṭum inelna hi khawpui 12-ah khelh tur niin final hi July 12-ah khelh a ni ang.

Group A (Rome & Baku)

Turkey, Italy, Wales, Switzerland

Group B (Saint Petersburg & Copenhagen)

Denmark, Finland, Belgium, Russia

Group C (Amsterdam & Bucharest)

Netherlands, Ukraine, Austria, Play-off winner D (A)*

Group D (London & Glasgow)

England, Croatia, Play-off winner C, Czech Republic

Group E (Bilbao & Dublin)

Spain, Sweden, Poland, Play-off winner B

Group F (Munich & Budapest)

Play-off winner A (D)*, Portugal, France, Germany

* Path A winner hi group F-ah dah an ni a, mah se Romania hi pakhatna a nih chuan group C-ah an awm thung dawn. Romania hi inelna thlengtu zinga mi an nih avangin group match hi an mualah an khelh a ngai. Hei vang hian group F-ah chuan path D-a pakhatna an awm thung ang.

Path A:    Iceland v Romania, 

    Bulgaria v Hungary

Path B:    Bosnia and Herzegovina v         Northern Ireland, Slovakia         v Republic of Ireland

Path C:    Scotland v Israel,

    Norway v Serbia

Path D:    Georgia v Belarus,

    North Macedonia v Kosovo