Stevie G hun a herliam ta

May 25, 2005. Istanbul khawpuiah a hunlaia player ṭha rual awmkhawmna AC Milan leh Liverpool ten Champions League final an khel a, first half-ah Milan-in 3-0 in hma an hruai. Team pahnih player-te khaikhinin Reds tan chak a beiseiawm tawh lo - chu chu khawvelin a hmuh dan a ni.

Mahse, player pakhat bei­dawng ve duh lo a awm a, khaw­velin a beisei ngam loh thil beisei tlat a awm - chu mihring chu Steven Gerrard a ni. Liverpool captain hian minute 54-naah Milan keeper Dida ban phak lohin a tauh goal a, si hnih lai sut zawh la ngai mah se Reds tana beiseina siamtu a ni - he player hi a kut pahnih vai vir chungin a tlan kual a, Liverpool fans leh khelmual chhunga a ṭhiante hnenah beiseina ala awm tih a hriattir.

Captain ber a huaisen miau a, Liverpool beiseina a nung thar. Vladimir Smicer-a'n Reds goal hnihna a khung chhunzawm a, Xabi Alonso chuan Gerrard-a penalty hlawhchhuah pet goal lo mah se a per let lam chu si phurh sut nan a khung - heng zawng zawng thlen hun chhung hi minute ruk chauh a ni a, thil mak min hmuhtir turin 'minute ruk' chiah Reds-in an mamawh. Penalty-ah an chak chhunzawm a, Gerrard-a hoin Liverpool-in football-a thil thleng ropui ber pawl an ziak.

The Gerrard Final

Steven Gerrard-a hun tawn ropui zawng zawng ziak dawn ila ziah sen a ni lo. Mahse, Istanbul thil mak piahlama khawvelin a hriat reng tawh tur chu FA Cup 2006 final-a Liverpool-in West Ham an lehthal kha a ni - tun thlengin 'The Gerrard Final' tia hriat a ni hial.

Minute 90 thleng chu West Ham-in 3-2 in hma an hruai a, Istanbul-a thil mak thlentirtu Gerrard kha Liverpool captain a ni miau a, English midfielder hian yard 30 vela hla aṭangin an si phurh sutna goal ropui khungin penalty-ah an chak zui. Millenium Stadium-a mipui thawm chu ring tak a ni.

Gerrard khan a thiamna hmang­in team a ṭanpui ṭhin a ni mai lo a, khelmualah a player-te chu a chetzia hmangin player ṭha zawk ni turin a pui ṭhin a, inkhel thlak danglamtu a ni a, a khelhpui player tan chung en loh chi a ni lo.

A hun a liam ta

Gerrard-a'n Liverpool tan match 710 khela goal 186 a khung hnuah LA Galaxy a pan a, MLS-a season hnih a cham hnuah Stevie 'G'-a'n bun leh ngai tawh lo turin a boot a khai ta. Captain Fantastic tia hriat lar chuan, "Ka career-a thil ropui leh hriatreng tlak tam tak ka tawn te kha ka chhuang takzet a ni. Career ropui tak ka hmang a, Liverpool, England leh LA Galaxy-a ka hun tawn zawng zawng kha lawmna tur hlir a ni," tiin a sawi.

Liverpool player zinga ropui ber ang hiala an sawi chuan, "Liverpool kawr ropui tak ha chungin ka naupan laia ka duhthusam chu ka hlawhtlin tir thei a ni," tiin a sawi a, Reds jersey ha chunga a football nun a hmang thei chu a chhuang hle. England captain ṭhin chuan sawi chhunzawmin, "Ka hmalam hun chu hlim takin ka thlir a, he game-ah hian hnathawh zawh loh tam tak ka la nei a ni," tiin coaching lama kal a tum - Gerrard hian MK Dons-in manager tura an sawmna chu ala hma mah mah a tih thu a lo sawi tawh a, Liverpool coaching staff zinga a tel chu thil beiseiawm ber pawl a ni.

Gerrard-a inchhuang

Kum 2003-a Reds manager Gerard Houllier-a'n captain armband a hrentir Gerrard chuan, "Liverpool tan match 700 chuang, a tam zawk captain nichunga ka khel thei kha ka inchhuang a, nomawi ropui tak tak Anfield-a ka hawn theih kha ka inchhuang lehzual a, a bik takin Istanbul-a kan hun tawn ropui kha chu ka hre reng tawh ang," tiin Champions League nomawi a chawi chu hun danglam bik a nih thu a sawi.

FA Cup, League Cup, UEFA Cup leh Champions League final-a goal khung vek thei awmchhun chuan, "England tan match 114 ka khel thei leh captain ka ni thei te kha inchhuanna tham a ni. Anfield-a hun ka hman chhungin player ṭha tak tak khelhpuiin manager ropui tak tak ka hrawn a, backroom staff te thlengin min ṭawiawmna zawng zawngah khan lawmthu ka sawi a ni," a ti.

Premier League legend?

Kum 2015-a Liverpool fan-ten an club player neih tawh zinga ropui bera an thlan Gerrard-a'n Premier League-a season 17 hun a hman chhungin champion nomawi a chawi miah lo a, pahnihna dinhmun erawh vawi thum a luah thung - he thil vang hian mi tam takin Gerrard hi Premier League legend-a pawm harsa an ti.

Mahse, Stevie G sulhnu hi sawi nep theih a ni lo. Ryan Giggs (632) leh Jamie Carragher (508) dawtah Premier League match (504) khel hnem ber a ni a, PFA Premier League team of the year-ah vawi riat a lang thei a, goal 120 khungin assist vawi 92 a nei a, 2013-14 season-a a chetsual vanga Manchester City an phak loh ṭum pawh khan goal 13 khungin assist 13 a la nei cheu.

Gerrard chuan, "Premier League nomawi ka chawi loh chungchangah zawhna vawi tam ka dawng a, ka vanglai khan Reds hi kalsan duh ni ila chuan tunah hian Premier League medal pali emaw panga tal awrh chungin ka awm ang a, a nih loh pawn England pawn lamah hlawhtlinna tam zawk ka chhar thei. Mahse, Liverpool-a cham ka thlang kha tun thlengin tisual in tihna ka nei lo a, ka tana pawimawh ber mipuite laka ka rinawm kha ka hlim a ni," a ti.

UEFA Team of the Year leh FIFA FIFPro World XI-a vawi thum ve ve lang thei chuan sawi chhunzawmin, "Sum ka um ngai lo a, ropui duhin ka tlan ngai hek lo. Premier League nomawi ka neih loh avangin pawi ka ti ngei a, mah se ka rinawmna avang khan ka hlim a ni. Liverpool hi ka tan chuan khawvel a ni," tiin a tana Merseyside club-in awmze ril tak a neih thu a sawi.

Mangṭha Stevie

Dirk Kuyt chuan, "Stevie nena kan khel dun thei kha ka inchhuang a, player ka inkhelhpui tawh zingah chuan a thiam ber a ni. He thu ka sawi hian Luis Suarez, Fernando Torres, Ruud van Nistelrooy leh Arjen Robben te ka khelhpui tawh tih hi miin hria se ka duh a ni," tiin a captain hlui chu a dah sang hle.

England legend Alan Shearer chuan, "I hmalam hun atan duhsakna ka hlan che. He game ti ropuitu zinga chhiar tel i ni reng tawh ang," tiin a thlah a, Xabi Alonso chuan, "Kumkhuain legend i ni ang," tiin a thlah ve bawk.

Reds keeper hlui Pepe Reina chuan, "I kianga khelh kha inchhuanna tham a tling a ni, ka
ṭhian. Khelmual pawn leh chhungah entawn tlak i ni reng a, engkim avang khan ka lawm e aw, legend," a ti a, Tim Cahill chuan, "Career ropui tak i hman avangin ka lawmpui che a, player ka hmachhawn tawh zinga ropui ber pawl i ni," a ti thung.

Barcelona defender Javier Mascherano chuan, "I kianga ka khel ve thei kha ka vannei a ni," a ti a, Fernando Torres chuan, "Khelmual khata kan awm ho thei kha inchhuanna tham a ni #YNWA," tiin a thlah ve bawk.

Malin i kal ngai lo ang

Steven Gerrard.