Rooney hoin United an ropui

Manchester United captain Wayne Rooney-a'n club tana Europe-a goal khung hnem ber record a siam zanah a team hnehna a chanpui a, Europa League last 32 lut tura an bei-sei-na chhi nung turin an mikhual Feyenoord chu 4-0 in an sawp.

Minute 35-naah Zlatan Ibrahimovic chuan Rooney tan through ball duhthusam a siamsak a, English striker hian Europe-a a goal 39-na ni turin a khung. Rooney hian Juan Mata tan siam sak ve lehin Spanish midfielder hian an goal hnihna ni turin a khung a, Liverpool keeper hlui Brad Jones chuan an lama a tih luh hnuah Jesse Lingard chuan injury time-ah an chak nemngheh nan a khung ve bawk.

United-in group stage match hnuhnung ber chu De-cember 8 zan khian Zorya Luhansk khelmualah an khel dawn a, Jose Mourinho-a naute tan knock out stage lut turin Ukrainian club lakah point khat hlawh chhuah a tawk ang.

Mkhitaryan a inlar

Jose Mourinho-a'n a lo sawi lawk tawh ang ngeiin pound maktaduai 26 man Henrikh Mkhitaryan a inlantir a, Armenian midfielder hian a hun ṭha neihah inkhelh a phu tih a lantir. Borussia Dortmund midfielder hlui hian khelmual chanve aṭanga ball khalha Feyenoord defender ho a bum nual hnuah Jens Toornstra chuan a lo ti tlu a, Dutch midfielder hian red card a chawi lo chu a vannei a, referee-in freekick a pe miah lo chu thil mak a ni bawk.

Minute 82-a inkhelh chhunga shot vawi ruk nei thei midfielder chuan, "Ka in-khel leh thei ta hi ka lawm a, khelmual sir aṭanga ṭhiante inkhel thlir kha a hrehawm ṭhin em em a ni. Hun ṭha nei turin ka thawkrim a, theihtawp ka chhuah ṭhin. Kan match hmasa berah pawh inlan leh ka beisei," tiin a sawi a, Pathianni zan dar 10:00-a West Ham an mikhual hunah engkim a hriat ang.

Hei le Rooney

England tan a fehchhuah naah Rooney-a'n ṭhiante inneihna a chhim a, ram tan duty a neih laia zan rei tak thlenga party striker hian sawisel hlawh viau mah se 'hmachhawp tam tak' a la neih thuin amah sawiseltute a chhang a, Ningani zanah a thusawi dikna thil tih hmangin a lantir bawk.

Rooney hian Europe-a Uni-ted tana goal khung hnem ber ni tur hian Ruud van Nistelrooy a khum a ni mai lo a, Red Devils tana goal khung hnem ber Sir Bobby Charlton-a record goal 249 tluk turin goal khat chiah a mamawh tawh bawk - Everton striker hlui hian sawisel hlawh viau ṭhin mah se ropuina ram panin a kal zel.

Mourinho thukhawchang

Manchester United boss Jose Mourinho chuan, "Ni danga kan khelh ṭhin dan thoin kan khel a, tun ṭuma a danglamna chu kan chance neihah goal kan khung tawh hi a ni," tiin an khelh
ṭhat thar thut avanga chak an nih loh thu a sawi.

Portuguese manager chuan Rooney fak nghalin, "Rooney-te ang player hi chuan amah sawiseltute chhanglet turin eng nge tih a mamawh tawh chuan? A hmabaka hun tlemte a la neih hi nuamti takin thlir sak mai ang u, chu chu amah pawn a tum ber a ni. Tuna pawimawh ber chu last 32 lut tura point kan mamawh hi a ni," a ti.

Saints chak lo

Southampton tan goalkeeper Fraser Forster-a'n save ropui vawi hnih lai nei mah se a team a chhanhim zo chuang lo a, khual-mualah Sparta Prague chu 1-0 in an hneh lo. Mualneitu team tana goal awmchhun hi Costa Nha-moinesu-a'n minute 11-naa hnai set sawt aṭanga a volley goal a ni.

Saints hian hnehna an chan zawh loh miau avangin last 31 lut tur chuan hmabak ko tak an nei a, an point hmuh ang zat hmu ve tho Hapoel Be'er Sheva nen an match hnuhnung bera an inhmachhawn hunah an chak zo lo a nih pawn Israeli club hi goal chhuah miah loa an inhneh-tawkpui tal a ngai tawh ang.

Southampton boss Claude Puel chuan, "Result duhawm lo tak a ni a, inkhel bul ṭan ṭha viau mah ila freekick aṭanga ball kal zela goal kan chhuah kha a pawi a ni. Tunah chuan Hapoel nena kan in hmachhawn tur kan thlir lawk a ngai a, last 32 luh ngei hi kan tum tur a ni," tiin a beidawng duh lo.

Saints hian Pathianni zan dar 10:00-ah Premier League match khel turin Everton an mikhual ve leh ang.