Inter Milan an tla

European champion vawi thum ni tawh Inter Milan chu Europa League group stage aṭanga pet chhuah an ni. Ningani zan in-khelah Inter hi Israel club Hapoel Be'er Sheva lakah 3-2 in an chak lo a, group match khelh hmabak pakhat la nei mah se an tan knock out round a luh theih tawh loh.

Stefano Pioli-a'n a match hmasa berah AC Milan 2-2 in a inhneh-tawk-pui a, Europa League lamah pawh bulṭan ṭhain Mauro Icardi leh Marcelo Brozovic te goal hmangin 2-0 in hma an hruai. Mahse, Lucio Maranhao-a'n goal khat a khung hnuah Inter goalkeeper Samir Handanovic chu yellow card vawi hnih hmuh vangin hnawhchhuah a ni zui a, Anthony Nwakaeme leh Ben Sahar ten goal khat ve ve khungin an lehthal.

Tun season tih lohah chuan Inter hi an che chhe viau ngai lo, Champions League emaw Europa League pawh nise an inlan hnuhnung 10-ah chuan group stage an paltlang ziah a, tun ṭumah erawh an record ṭha tak hi an chhawm nung thei lo.

Match nga an khelh tawh aṭangin Sparta Prague chuan point 12 hmuin knock out round an lut chiang tawh a, an hnuaiah hian point sarih hmu pahnih Southamton leh Hapoel Be'er Sheva ten beisei an la nei thung.

Inter hian tun kartawp Serie A match an nei dawn lo a, karleh Thawhṭanni zan dar 1:30-ah Fiorentina an lo mikhual leh ang.