Formula 1 chinfel a ni dawn

Pathianni zan dar 6:30 hian tun season-a Formula 1 intlansiak hnuhnung ber tur Abu Dhabi Grand Prix tlan a ni dawn. Mercedes driver pahnih Nico Rosberg leh Lewis Hamilton ten nomawi an inchuh ang.

Driver championship-a hmahruaitu Rosberg hi point 12-in a teammate Hamilton lakah a chungnung zawk mek a, a vawi khat nana champion turin beisei a nei sang hle.

Abu Dhabi Grand Prix-ah hian Rosberg-a'n hnehna a chang emaw pathumna chin a ni a nih chuan a champion dawn chiang. German driver hi palina aṭanga parukna inkarah a thleng a nih chuan Hamilton-a'n pakhatna emaw pahnihna a nih phak chuan a champion nomawi a hum thung ang.

Kum 2008, 2014 leh 2015 world champion Hamilton hian tun hnai intlansiak hnuhnung pathumah a zawna hnehna a chan vek theih avangin beisei a nei sang a, tun season-a vawi kua hnehna chang tawh Rosberg tan chetsual a thiang lo.

Kumin intlansiak hnuhnung ber hi champion hlui Jenson Button tan a intlansiak hnu-hnung ber a ni dawn. McLaren driver hian kum 17 chhung zet a lo chenchilh tawh Formua 1 intlansiak a chawlhsan tur thu a puang a ni.

Kum 36-a upa Button chuan, "Tuna ka dinhmunah hi chuan season thar lama Formula 1 car khalh chhunzawm thei ka ni tawh lo. Ka kum a tam tawh bakah ka hrilsena hi tun hma aiin a chak lo tawh zawk. Pathiannia kan intlansiak turah hian ka theihtawp ka chhuah dawn a, ka hun hnuhnung a nih tawh avangin a ṭha thei ang bera a hmawr bawk ka tum a ni," tiin a sawi.