ISL-ah Goa beiseina a chuai

Ningani zan Indian Super League inkhelah Atletico de Kolkata-in FC Goa semifinal beiseina an chhu chhia a, Fatorda Stadium, Goa-a inkhelah mualneitu team hi 2-1 in an hneh. ATK tan Juan Belencoso-a'n goal hmahruai a khung hnuah Goa tan Mandar Rao Dessai chuan an si phurh sut mah se an ṭang tluan thei lo a, Stephen Pearson chuan injury time-ah mikhual team tan chakna goal a khung a ni.

FC Goa-in match hnih chiah khelh hmabak an nei tawh a, table mawng berah an awm avangin Brazilian coach Zico-a'n semifinal luh beiseina an nei tawh lo tih a pha lo. Player a nih laia 'The white Pele' an tih ṭhin chuan, "Thinlung na tak chunga ka sawi theih chu kan beiseina a tawp tawh a, kan tih theih awmchhun chu kan hmabak match hniha ṭha taka khelh a ni," tiin a sawi.

Ningani zan inkhelah hian Kolkata club tan Khawzawl tlangval Robert Lalthlamuana chuan inkhel bul a ṭan a, Lalrindika Ralte erawh a inlan lo thung.