Dampuia'n Chanmari West natna a chhâwk!
Chanmari West FC-in match nga chhung chak hmel an hmuh loh hnuah Laldampuia goal hnih hmangin Chhinga Veng FC 2-0 in an hneh a, Mizoram Premier League Season 5 semifinal an lut.
November 24 zan Lammuala inkhel hi Chanmari West mipui tan zan chhinchhiah tlak a ni a, MPL an tlin avanga an lawm hnua an hlim ber ṭum a ni hial ang - a aia sang thleng turin din-hmun ṭha takah an ding.
Chhinga Veng erawh Din-thar FC an hneh avanga relegate an pumpelh hnuah chak duhna thinlung an paih bo a, semifinal an thlen phak loh vanga an lungngaihna aiin Chanmari West mipui auh elna vanga an tawrh-na chu na an ti zawk ang.
West Warrior nge nge
Chhinga Veng winger H. Lal-muankima'n hrem vanga match hnih a âwl hnuah Chanmari West tlarhnung tan harsatna a siam nghal a, MPL kaitharin bul an
ṭan ṭha hretah ngaih theih.
Amaherawhchu minute 11-naah tun season-a player hlauh--awm ber Dampuia a rawn inlar a, West Warrior play-er R. Lal-danmawia, Ra-meng--mawia leh Lalbiak-hlua ten ball an inpek kual hnuah Kawrte-thawveng tlang-val hian team goal ṭha tak a khung.
Chanmari West mipui an lawm rei hman lo - Chhinga Veng an hlauhawm a, an winger MK-a ball pet ṭha zet chu West Warrior keeper Lalruatpuia'n (Mama) dang lo se inkhel a danglam thei ang. Darkar chanve a pel awrh tihah coach Chawngthansanga'n Services midfielder Francis Zonuntluanga a luhtir a, Leitan tlangval hian MPL boruak sangah danglamna a thlen zo lo.
West Warrior tlarhnung pui tura ding dun Reuben Zosang-puia leh K. Lalnunzama te an inkawp fuh a, Chhinga Veng chhuanvawr MS Dawngliana a che thei lo.
Second half ṭan phatah Lal-khawpuimawia an luhtir a, Kelkang tlangvalin harhna a keng tel tawh lo.
Minute 57-naah Danmawia leh Ramenga ten wall pass hmangin Chhinga Veng in-chhuan-na Emma Chigozie leh K. Lalthlahlova (Patea) te an ṭhiat a, Patea hian an tihsual siamṭhat a tumnaah Sialhawk tlangval Danmawia tlawh thluin hnawhchhuah a ni. Freekick pet turin Dampuia a rawn pen chhuak a, Chhinga Veng keeper R. Lalhmangaihzuala wall siam fuh tawk lo lai hmu fuhin kawh zetin a pet goal.
Chanmari West dinhmun a
ṭha a, amaherawhchu substitu-tion siam an tumna lamah Ramenga'n ṭul loah a yellow card vawi hnihna a hmu a, hnawh chhuah a ni. Player 10 ve ve an khelh hnuah Chhinga Veng inkhel zia deuh mah se goal khung tur khawpin an khel ṭha lo.
Natna chhawktu Dampuia
Goal hnih khungtu Dampuia man of the match-ah thlan a ni a, Chanmari West captain hi match 14-ah inlan kim vekin goal 10 a khung bawk.
Dampuia hi top scorer a ni mek a, Chanmari FC forward Malsawmfela aiin goal khatin a khung tam zawk. West Warrior captain ropuina chu an khingpuiten a che ṭha tih an hria a, Chhinga Veng coach pawhin an ven uluk tur thu sawi lawk mah se an dang thei lo.
Dampuia'n result ṭha neih loh vanga na tuar mek, Aizawl FC laka an goal pawm loh avanga Chanmari West mipui rilru natna a chhawk a, inkhelh hun chhung leh a banah an dam tih a chiang hle.
Mipui au thawm
Chanmari West mipuiin K. Kawla Stand aṭangin thawm an nei reng a, MPL club dang au hla la khawmin Chhinga Veng mipui an auel a, MPL kaithar ṭantute tan season thar nghah bak tih theih a awm tawh lo.
Chanmari mipuiin MPL2-a final thleng pha lo Dinthar mipui an auh elna hmangin Chanmari West-in Chhinga Veng an 'Bye Bye' a. An khingpui au hla hawhin 'Chanmari West nuam nuam nuam' tihin an au dual dual bawk.
Maimawms-in an coach an chawimawina hla hawhin, 'Zara i hmel a ṭha' an ti rual ṭhup
ṭhup a, Bethlehem Vengthlang hla thul khung phawrh chhuah-sakin 'Chhinga Veng kan nêk sawr pawr e' tiin an zai ṭhap
ṭhap bawk. Chanmari West an hlim a, semifinal-ah HC Zar-zoliana enkawl team hian
ṭawiawmtu an nei ṭha ang.
Ka thiam loh a ni - Chawnga
Chhinga Veng FC coach Chawngthansanga chuan, "Midang mawhpuh tur an awm lo a, keimah thiam loh liau liau a ni. Semifinal kan luh lohna chhanah hian mawh ka phur a, ka player rem danah tihfuh tawk loh ka nei a ni," tiin chak loh chhuanlam a siam lo.
A sawi hi a dik. An inhneh-tawk palh chuan semi final an lut lo tih hre chungin forward pahnih a hmang ngam lo a, mangan hnuah a hmang leh tho si. Inkhel ṭan hnu lawkah a midfield a siksawi bawk a, inkhel a tidanglam zo si lo.
Zara a lawm
Chanmari West coach HC Zarzoliana chuan, "Kan khelh dan a lungawi thlak ka ti a, kan result-ah ka lawm bawk. Semifinal atan inpuahchahna hun ṭha kan nei a, champion ngei turin kan hun neih ṭha taka hman kan tum ang," tiin inkhel banah a sawi.
West Warrior boss chuan , "Chan-mari West mipui min
ṭawiawmna avangin ka lawm a, semifinal kan khelh hunah pawh min au phur zel turin ka sawm tak meuh meuh a ni," tiin mipui an pawimawh thu a sawi.
Zara hian MPL-a team pahnih champion-pui hmasa bertu nih theihna hun ṭha a nei e.
Tute nge inlan?
Chanmari West FC (4-2-3-1) : Lalruatpuia; Vanlalzuia Hnamte, Toky Zomuanpuia, Lalawmpuia, Racy K. Lalremmawia; K. Lalnunzama, Reuben Zosangpuia (Lalmuansanga 80'); Laldampuia, Lalbiakhlua (H. Lallianzama 83'), R. Laldanmawia; Ramengmawia (Red Card 75')
Chhinga Veng FC (4-4-1-1) : R. Lalhmangaihzuala; R. Laldinliana, K. Lalthlahlova (Red Card - 54'), Emma Chigozie, Lalramfelpuia; VL Lawma, VL Thanga (Lalkhawpuimawia 46'), Paul Ramfangzauva (Francis Zonuntluanga 31'), H. Lalmuankima; Joseph Lalnunpuia (Lalramliana Varte 82'), MS Dawngliana
ZoFooty Statistics
Chanmari West FC 2 - 0 Chhinga Veng FC
CWFC : Laldampuia 11’, 57’
MoM : Laldampuia, CWFC
46% Ball Possession 54%
8 Shots 14
4 On Target 4
2 Yellow Cards 2
1 Red Cards 1
Powered By Rainbow Multibrand
Mobile Showroom