MLS tan beisei tur a la awm

GIG Motors MPL12 semifinal second leg-ah vawiin tlai dar 4:00 hian Lawngtlai club MLS leh I League club Chanmari FC te an inkhel dawn. First leg-ah Chanmarians hi 2-0 in an chak a, an inkhelh tawhna thlirin MLS tan beisei tur a la awm.

Lalruatliana Sailo enkawl MLS khel a en tlak a, first leg-ah pawh Chanmari nen an inkhel tawk. Mahse, goal an chhuah hma an tuar a, hun tawp lama an chance neih an khung loh bawk avangin an inkarah goal hnih a la awm. Southern Blues hian second leg-ah first leg-a hun tawp lama an rilru put hmang an chhunzawm thei a nih chuan Chanmarians tan buai theihna tur a ni thei ang.

MLS midfielder Lalremmuana'n midfield-ah huaisen takin ball a khawih ngam a, hei hi Chanmari tan buaina tham a tling. Tlarhma lama awm Freddy Lalrinkima, Ngurthanmawia leh HC Willis Byhna te an chak ṭha a, final khelh an duh a nih chuan goal an khung a ṭul.

Lawngtlai mipuiin MLS an ṭawiawm ṭhat leh a ṭul a, first leg aia thawm an neih ring a ngai bawk. Chanmari lam tan erawh hna a awlsam hret dawn a, chutihrualin an ṭhat theih dan bera an khelh erawh a ṭul dawn. Tlarhma lamah KC Malsawmsanga'n match hnuhnung pathumah goal khung vekin goal li a khung a, ani hi I Day Football final-a goal awmchhun khungtu a ni.

Chanmari team enkawltuten champion ngei an tum a, squad tihchhah nan Christopher Kamei, Zothanpuia leh Lalrokima te an lak belh leh avangin position tinah a thlakna tur nen an nei ṭha vek. Chutihrualin MLS-in I League club hi round 8-ah an hneh tawh a, an hneh tawh anih avnagin an hlau bik lo ang.