Haaland-a'n goal a khung lo

Erling Haaland-a goal khung kaltluang lai chu a tawp ta! Manchester City striker hian Aston Villa lakah a khung thei lo a, match 12 a khung zawn tawh chu tawpin a team hi 1-0 in a tlawmpui.

Pep Guardiola nauten inrintawkna sang tak nen Villa Park an tlawh a, goal awmchhun khungtu chu Matty Cash a ni. Cash hian corner aṭanga ball kal chu box pawnah a lo chang a, amah vengtu a tlan pelh hnuah a khung.

Goalkeeper Gianluigi Donnarumma a lo tawlh chhuak hma hret si a, Italian keeper rin loh lamah ball a kal bakah Cash-a'n a pet ṭha ve tawk a, si ban ngahktu ṭha tak tan pawh dan ngaihna a awm lo.

Man City lamin na taka vuak let an tum a, an nawr na bawk. Phil Foden hnen aṭanga a ball hmuh chu Haaland-a'n ṭha takin a luhpui, keeper Emiliano Martinez chauh hmachhawn tawh mah se a khung, a ball pet lei hrula kal chu a lo mansak.

Aston Villa tan John McGinn-a'n hun ṭha hmu mah se City keeper Gianluigi Donnarumma a paltlang zo lo a, forward Jadon Sancho pawhin goal khung theihna remchang a hmuh chu a hlah bawk.

Unai Emery nauten striker ṭha Haaland an veng tluan thei - goal khung zawn rei lamah Crsitiano Ronaldo nen record inang an chelh a, match 12 an khung zawn thei; Ronaldo kalsan theihna remchang a neih chu a hmang ṭangkai thei ta bik lo a ni.

Man City manager Guardiola chuan, "Tawnhriat tam tak ka lo nei ve tawh a, season khat chhung hi rei tak chhung khelh tur a ni tih ka hria, chumi chhung chuan fiahna hrang hrang pawh kan hmachhawn dawn.

"Kan hmabak chu Bournemouth an ni dawn, anni hi season hmang ṭha em em lai an ni. September a kan dinhmun leh khelh dan ngaihtuah kha chuan tunah hian lawmna tur tam tak a awm," tiin a sawi a, hmahruaitu Arsenal chu hnaih zel a duh tih a sawi bawk.

Spanish manager Emery enkawl Villa pawhin hmalam an pan, season bul ṭan fuh lo mah se an insiamṭha leh tawh. Premier League match kua an khelh aṭanga point 15 hmuin pariatna an ni a, an chunga awm Liverpool an phak lohna chu point khat chauh a ni.