Manipur aiin Mizoramin goal khung tam

Sub Junior Boys National Football Championship-ah Mizoramin bul an ṭa ṭha a, nimin khan Odisha chu 13-0 in an sawp. Group A inkhel dangah Manipur-in Bihar 10-0 in an sawp a, K. Lalrindika kaihhruai Mizoram team goal an khung tam zawk avangin hmahruaitu an ni. Group khat aṭangin pakhat chauhin knockout stage an luh dawn avangin goal khung tam hi a pawimawh thei ang.

Mount Litera Zee School Ground, Amirtsar-ah Mizoramin bul an ṭan ṭha tawk lo a, Odisha-in goal khung ngeina tur chance an hlah. Mahse, natural grass-a khel ngai lo Mizo naupangte an insiamrem a, Odisha nen an inthlau hret.

Mizoram team hian first half-ah goal ruk an khung tawh a, second half-ah goal riat khung belhin a khat mawi tawkin goal an khung a ni ber. Mizoram tan Mualpui naupang Jason Lalawmpuia'n goal li a khung a, Republic Veng naupang Bernard Lalchhanhima leh Zemabawk North naupang Jacob Malsawmsanga ten goal thum ve ve an khung .

Kulikawn naupang Abraham Malsawmhlua'n goal hnih a khun a, Muallungthu naupang Zakaria Lalmuanzuala'n goal khat a khung bawk. Coach K. Lalrindika chuan, "Kan tihsual kan hria a, insiamṭhat dan tur kan zawng nghal ang. Match hmasa ber chauh a ni a, tha thlah theih kan ni lo," tiin Vanglaini a hrilh.

Fixtures & Results

Nimin Inkhel Results

Manipur 10 - 0 Bihar

Mizoram 13 - 0 Odisha

October 29, Nilaini

Bihar 9:00 AM Mizoram

Odisha 3:00 PM Manipur

October 31, Zirtawpni

Manipur 9:00 AM Mizoram

Odisha 3:00 PM Bihar