Zverev hnehin Sinner a champion

Jannik Sinner chuan Alexander Zverev lakah set hoh hmasa mah se huaisen takina tho chhuak a, a tawpah hnehna changtu zawk niin Vienna Open nomawi a chawi - tennis season kal laia title pali a lakna a ni ta chiah bawk.

Pathianni zan khan Centre Court-ah final khelh niin, seeded pakhatna Sinner hi a tir lamah malpui na vangin a buai deuh. Mahse, inkhel chhunzawm theiin, darkar hnih leh a chanve an inkhelh hnuah Zverev hi 3-6, 6-3, 7-5 in a hneh.

Italian tlangval Sinner hi hard court-a inkhel thiam bik a ni a, indoor hard court-ah phei chuan a zawnin match 21 chhung hnehna a chang tawh; October tir khan China Open-ah a lo champion tawh bawk a ni.

Tennis a khelh hun chhunga nomawi 22 la tawh Sinner chuan, "Inkhel harsa tak a ni a, a bik takin a tir lamah phei kha chuan rilru leh taksa a hah takzet, beidawng duh loa beih hram hram rah erawh a tawpah ka seng.

"Set hmasa ber harsa mah se hma ka sawn zel a, set thumna kan khelh lai phei kha chuan inrintawkna ka nei sang tawh hle a, ball ka hmachhawn apiang kha ka huphurh duh tawh lo, nuamti takin ka inkhel tawh zawk a ni," a ti.

Player pahnihte vawi riat an inhmachhawnna niin, vawi li ve ve hnehna an chang tling ta chiah. Chak lo mah se Zverev hi ATP Finals khel turin a tling nghal - Zverev hma hian Sinner, Carlos Alcaraz leh Novak Djokovic te chu an lo tling tawh bawk.

Mipa tennis season khar nan, ranking sang zual pariat te chuan November 9-16 chhung hian Turin, Italy-ah ATP Finals an khel leh dawn a, player pali an tlin tawh avangin hmun ruak dang pali chu hnawh khah hmabak a la ni.

ATP Finals 2025-ah hian singles bakah doubles inelna pawh a awm tel ang.