Lazio lakah Juventus an tlawm

Pathianni zan Serie A inkhelah Lazio chuan an mikhual Juventus chu 1-0 in an hneh, goal awmchhun hi Toma Basic-a'n minute kuana leka a khung niin, mualneitu lamin point thum hlu tak an hlawh chhuak.

Igor Tudor-a enkawl Old Lady hi tun hnaiah an khel chhe thei lo - Como leh Real Madrid an hneh loh hnuah Lazio an ngam lo zui leh a ni a, an insiamṭha thuai a nih loh chuan champion mai ni loin a sang zual pali zinga tal phak pawh a harsa dawn.

Juve coach Tudor chuan, "Hliam leh harsatna vangin player ṭha ṭhenkhat kan chhawr thei lo, kan tan chuan hun harsa a ni mek. Tun ang hunah hian lungrual leh inpawh taka kan awm ho a pawimawh, kan harsatna sukiang turin kan bei ang.

"Tih sual nei tlem turin kan infuih nasa, tun ṭumah pawh khan tihsual kan nei tlem. Mahse, a tir lama vawi khat tihsual neih zauh kha a tawp thlengin kan tuar ta a ni," a ti a, an match lehpek atan Nilaini zanah Udinese an mikhual zui leh dawn a ni.

Old Lady hian hliam vangin Kenan Yildiz, Gleison Bremer, Juan Cabal, Arek Milik leh Carlo Pinsoglio te an chhawr thei lo a, an ṭhat dan berin an khel thei lo. Dusan Vlahovic inlan thei mah se danglamna a siam phak ta bik lo.

Lazio coach Maurizio Sarri chuan, "Zawimuangin hma kan sawn, hmasawna hmel hmuh tur a awm hian a lawmawm. A ngai renga kan din chuan midangin min tlansan hun kha a lo thleng mai ṭhin a, tunah erawh midang tlansantu nih kan tum thei tawh ang," a ti.

Italian manager Sarri enkawl Lazio hian Serie A match riat an khelh aṭanga point 11 hmuin 10-na an ni mek a, chak lo Juventus nen an inthlauhna chu point khat chauh a ni tawh a ni.