Formula 1 champion tur a chiang lo zel

Season tawp hmain intlansiak pali an la hmabak - Formula 1 season kal lai chu a hmawr bawk hnai tawh mah se champion tur a chiang thei lo. Driver pathum - Lando Norris, Oscar Piastri leh Max Verstappen ten nomawi an inchuh zel.

Pathianni zana tlan zawh tak Mexico City Grand Prix-ah McLaren driver Lando Norris chuan hnehna changin championship hmahruaitu nihna chu a teammate Oscar Piastri hnen aṭangin a chhuhsak nghal bawk.

August thlaa an tlan Hungarian Grand Prix hnuah Norris hian hnehna a chan lehna hmasa ber a ni a, season kal laiah vawi ruk chak tawhin nomawi hnaih ber a ni mek a, a hma hun chu a kuta awm a ni ta.

Point 14 laia hmahruai faltu Norris chuan, "Kar tawp nuam leh hlimawm tak a ni, chutihrualin a hmawr kan bawk tihna erawh a la ni lo. Thil dang ngaihtuah vak lo chunga hnehna ka chang thei hi ka lawm," a ti.

Mexico GP hi a hmunah mi 150,000 chuangin an en a, tawnhriat nei ṭha Verstappen chu pathumnaah a thleng. Red Bull driver hian intlansiak hnuhnung pali zinga pathumah hnehna a chang thei, tun ṭumah erawh dawhsan lawn phak chinah a lungawi a ngai.

Season chawhnu lam an hman tirh kha chuan Verstappen hian khatih laia hmahruaitu Piastri a phak lohna chu point 104 tehmeuh a ni a, tunah erawh Max-a leh hmahruaitu Norris inkarah point 36 chauh a awm ta.

Dutch tlangval Verstappen chuan, "Hmabak kan la nei, a tawp hma chuan theihtawp kan chhuah zui zel ang," a ti. Verstappen hian season li chhung chu a zawnin nomawi a chawi tawh a, kuminah a dinhmun ṭha lo hman viau mah se beisei a nei thar leh tawh a ni.

Lewis Hamilton erawh a boruak a la fuh thei lo, world champion vawi sarih ni tawh hian kumina a vawi khat nan dawhsan a lawn ngei dawn niin a lang hman. Mahse, lap ruknaah dan a bawh chhiat avangin hrem a tawk a, pariatnaah a lungawi a ṭul leh ta zawk.

Car intlansiakna sang leh ngaihhlut ber hi November 9, Pathianni zan dar 10:30 hian Brazilian GP an tlan leh ang, chumi hnuah Las Vegas, Qatar leh Abu Dhabi GP te an tlan chhunzawm leh dawn a ni.