Bournemouth an chak leh ta

Beisei phak baka season hmang ṭha Bournemouth-in Pathianni zan khan Premier League-ah hnehna an chang a, an mikhual Nottingham Forest chu 2-0 in an hneh - Cherries tan Marcus Tavernier leh Eli Junior Kroupi ten goal khat ve ve an khung a, Forest-in a chhanletna tur an neih loh avangin an tlawm.

Nottingham Forest tan coach thar Sean Dyche hnuaia EPL match an khelh hmasak ber a ni a, kar hmasa khan Europa League-ah Dyche ho hian FC Porto chu 2-0 in an hneh thei - hei vang hian Forest an phur a, mahse, Bunrley boss hlui hian EPL-ah chuan a la chakpui thei rih bik lo.

Bournemouth-in hnehna an chan avangin EPL match riat zet chu a zawnin tlawm an nei ta lo a, August thla laihawla Liverpool (4-2) an ngam loh hnuah khan an tlawm leh miah tawh lo tihna a ni - EPL pumpuiah match kua an khelh aṭangin Reds an ngam loh chiah hi tlawm an nei a, vawi nga chakin, vawi thum an draw.

Cherries hi EPL table-ah pahnihnaah an ṭhu ta vung a, point li chauhin hmahruaitu Arsenal an phak lo. Hetihrual hian Manchester City, Manchester United, Liverpool leh Chelsea te chu top four pawn lamah an awm ṭhap a, Premier League a ngaihnawm chhunzawm zel.

Hetihlai hian season hmasaa European football khel tura inpetkai thei khawpa khel ṭha Forest erawh an hniam zel a, relegation zone-ah an awm mek - league match kua an khelh tawhah vawi khat chiah an la chak ve a, vawi hnih draw neiin, vawi ruk ngawt a tlawm zawkah an ṭang ta a ni.

Forest hian season hmasaa chet ṭhatpui em emtu Nuno Espírito Santo chu 'result' vang ni loin, club neitu Evangelos Marinakis nena an inhmuh thiam loh avangin, September 8 khan an ban a, a tukah Ange Postecoglou la lut nghal mah se, Tottenham Hotspur boss hlui hian inelna hrang hrangah match riat bak a kaihruai hman lo.

Postecoglou ho hian match riat khelin, chak an nei miah lo a, Europa League-a Spurs champion puitu coach thlaktu Sean Dyche hoin thawnthu tharlam an beisei a, hun erawh a la duh ve deuh dawn niin a lang.