Tottenham tlâwmtu Chelsea

Antonio Conte-a kaihhruai Chelsea chelh thei an awm lo. Inrin-ni zan London Derby-ah Blues hian tun season Premier League kal meka hneh loh la tawng lo Tottenham Hotspur chu 2-1 in an hneh a, point 31 hmuin league hmahruaitu an ni.

Inkhel dangah champion lai Leicester City chu Middlesbrough nen 2-2 in an inhnehtawk a, goal kua luhna inkhelah Swansea City-in hnehna changin Hull leh West Brom te 1-1 in an inhnehtawk thung.

London a pawl

Stamford Bridge-a inkhelah mikhual Tottenham an chefuh hmasa zawk. Minute 11-na lekah Christian Eriksen chuan goal hmahruai khungin Champions League a-
ṭanga tla hlim Spurs beiseina a siam sak. He goal hi match ruk hnua Chelsea keeper Thibaut Courtois-a'n a chhuah leh hmasa ber a ni hial.

Mauricio Pochettino nauten first half an thunun zui a, goal dang erawh an khung belh lo. Chawlh lawk hma chiahin Nemanja Matic-a ball siamsak dawngtu Pedro-a'n goal a khung. Barcelona star hlui hian box pawnah duhtawka ball a vir pui hnuah mawi zet an siphurh a sut.

Second half-ah Chelsea an khel ṭha a, striker Diego Costa an ven ulukna lamah Victor Moses an theihnghilh. Jose Mourinho hnuaia khel phak lo right wing-back Moses hian minute 51-naah an goal hnihna a khung.

Tottenham defender ten Costa an ven rawn avangin Nigeria inter-national hian goal khung turin harsatna a nei lo mai ni loin amah vengtu an awm lo. Tun season-a goal chhuah tlem ber Spurs (10 goals) tlarhnung an mualpho chiang hle.

Kum 1990 February thla hnuah Spurs hian Chelsea khelmual Stamford Bridge-ah hian hnehna an la chang leh miah lo a, a zawnin match 30 chhung zet chu an hmelma khelmualah hian chak ni hmel an hmu tawh lo a ni.

Chelsea an kal zel

September 24 kha a ni a, Italian manager Conte hote chu Arsenal lakah 3-0 in an mualpho. Blues hi league table-ah 10-na niin khatih laia hmahruaitu Manchester City an phak lohna chu point riat a ni! Gunners an hneh loh zawh hian Conte chuan an insiam ṭhat tur thu leh club lian dang an el phak tur thu a sawi a, a sawi angin a awm zui.

Chelsea hian a zawnin league match sarih chhung hnehna an chang ta a, goal khat chiah an chhuah. Captain John Terry tan hmun awm lo tur khawpin David Luiz leh Gary Cahill te an rintlak a, striker Costa-a'n goal 10 khung tawhin Liverpool, Stoke City leh West Ham United-ah te loan hmanga an chhuahtir tawh Moses chu player pawimawh a ni bawk.

Eng nge an sawi?

Chelsea boss Conte chuan, "Totten-ham khan an khel ṭhain bul pawh an ṭan ṭha zawk ngei mai, goal kan chhuah hnua kan beih let dan kha a ropui. Inkhel hautak tak kan hmachhawn zawn nasa a, ka naute rilru puthmang hi a dik tawh avangin huaisen takin kan kal zel ang," a ti.

Conte chuan sawi chhunzawmin, "Champion sawi nan chuan a la hma lutuk a, he league hi a khirhin a harsa hle tih chu ka hre tawh. Spurs kan khelh aṭanga kan zir chhuah chu champion thei hi team paruk emaw pasarih emaw kan awm tih hi a ni," tiin a sawi.

Tottenham boss Pochettino chuan, "Inkhel pumpui kha kan thlir chuan team ṭha zawk kan ni tih a chiang a, point kan hmuh loh chhan kha chu kan vanduai vang chauh ani. Kan chak loh avangin ka lawm lo a, chutih rualin team ṭha tak lakah khatianga kan khelh theih avang erawh kha chuan lawmna tur a awm tho," a ti.

Foxes an vannei

Champions League last 16 lut thei leh Premier League nomawi kawltu ni bawk Leicester-in league-ah beisei ang result an nei thei lo. Middlesbrough tan Alvaro Negredo chuan season ṭan nia a goal khung chhunzawm nan minute 13-naah goal hmahruai a khung.

Boro defender Calum Cham-bers-a'n hand ball vanga penalty a chawi chu Riyad Mahrez-a'n goal ah chantirin 1-1 in chawlhlawk an hmang. Second half-ah Negredo bawkin Boro hma a hruai pui leh a, khualmualah point thum an hlawh chhuak dawn ngeia a lan hnuah Islam Slimani chuan hun tawp hma chiahin penalty aṭang bawkin an siphurh a sut.

Leicester manager Claudio Ranieri chuan, "Tlahniam thei dinhmunah kan ding a, point hmu lo tura kan lan hnuah point khat kan hmu leh bawk," tiin an vanneih thu a sawi.

Middlesbrough boss Aitor Ka-ran-ka chuan,"Inhnehtawk tur kan ni lo, a chhan chu a ṭha zawk kan ni. Penalty vawi hnih vangin point hnih kan hloh a, a pawi hle. Negredo chungah rinna ka nghat ngam a, a theihna san zia kan hmu leh ta," a ti.

Inkhel dang

Liberty Stadium-a inkhelah Swansea City chuan hun tawp hma minute thum la awmah goal hnih khungin Crystal Palace an lehthal. Midfielder Leroy Fer leh substitute Fernando Llorente ten goal hnih an khung bakah Gylfi Sigurdsson-a'n goal khat khungin mikhual Crystal Palace 5-4 in an hneh.

Table mawngphah lama talbuai mek Hull City tan captain Michael Dawson chuan second half-ah an si phurh sutin a club tan point hlu tak a hlawhchhuah pui. Mikhual West Brom goal hi defender Gareth McAuley tauh luh a ni.