Zo United mangṭha a ngai ta

Ningani zanah Dinthar FC-in Ramhlun North an hneh avangin Zo United chu Mizoram Premier League khelh zel theihna kawng hawnsak a ni a; amaherawhchu season liam taa Mizoram Police pet chhuaktu Bethlehem Vengthlang FC-in Reitlang FC hming pu ṭhin Zo United chungah zahngaihna an lantir lo a, Reiek mipui din club an relegate.

Lalbiaksanga Colney hoten Zirtawpni zanah Zo United 3-2 in an hneh a, BVT tan Lalnunmawia, PC Zosangliana leh PC Laldinpuia ten goal khungin an club history-a a vawi khat nan league round hmahruaitu an ni. MPL season li khelh tawhah league round-a hma-hruaitu hi an la champion zui ziah.

Zo United-in MPL an match hnuhnung berah an mamawh point thum hmuh tumin an theihna zawng zawng an chhuah. Malsawmdawnga leh H. Malsawmtluanga te hmangin an siphurh ṭum hnih an sut a, amaherawhchu a player pawimawh defender Malsawma Chhangte, midfielder Laldinmawia leh for-ward Jesse Laldinpuia te awm loh a lang a, minute 34-na leka Lalnunsanga (Tale-a) a inhliam bawk avangin semifinal lut chiang tawh BVT hneh theihna tur khawp hmanrua an nei tawh lo.

Zo United an han relegate a, tual-chhung football ngainatute hriatchhuah hmasak ber tur chu Reiek khua a ni. Reiek khaw mipui
ṭangrualin an din Reitlang FC-in kum 2012 khan playoff khelin pa-hnihna niin MPL khel turin an tling.

Hetih hunlai hian Reitlang FC hi MPL-ah ṭantute nei ṭha ber zinga mi an ni a, season liam ta khan Zo United tihin club hming hi thlak. Reiek khua leh club inthlunzawmna erawh MPL2 season zawh rualin a tawpah ngaih theih ni mah se he club din theihna tura khaw mipui an thawhrim avangin Zo United relegate hian Reiek a ṭhawng phak ngei ang.

Zo United technical director James Khamliansawma chuan, "Min ṭantu Lily Veng cultural club bakah Reitlang FC hming a put lai aṭanga tawha ṭantu zawng zawng te hnenah lawmthu kan sawi. An duh angin kan khel lo a, hei kan tlak pui a ni a, amaherawhchu Zo United hi an rawn thawhchhuah leh ngeina turin theihtawp kan chhuah ang," tiin MPL khel tur inpetling leh ngei an tum thu a sawi.

ZoFooty Statistics

Bethlehem VT 3 - 2 Zo United

BVT : Lalnunmawia 23'; PC Zosangliana 59'; PC Laldinpuia 87'

ZUFC : Malsawmdawnga 53'; H. Malsawmtluanga 64'

MoM: PC Laldinpuia, Bethlehem VT

51% Ball Possession 49%

9 Shots 15

5 On Target 9

1 Yellow Cards 1

0 Red Cards 0

Powered By Rainbow Multibrand

Mobile Showroom

Tute nge inlan?

Bethlehem VT (4-4-1-1) : Lalmuansanga; Lalhruaitluanga (K. Lalmalsawma 31'), H. Lalhlimpuia, Zothanpuia, B. Zothanmawia; Laldinliana Varte, Lalrintluanga, Zosangkima, Lalnunmawia (Laldingngheta 65'); PC Zosangliana; PC Laldinpuia (Samson Ramengmawia 83')

Zo United (4-1-4-1) : Lalvenghima; Vanlalruata, Rosangzuala, Lalnunpuia Pachuau, Vanlalhmangaiha; R. Lalthantluanga; Lalthazuala, H. Malsawmtluanga, Chhanrinpianga (Lalhlimpuia 89'), Malsawmdawnga (Dominic Lalruatfela 80'); Lalnunsanga (Isak Vanlalpeka 34').