Real Madrid chakna Ronaldo

Hliam vangin Gareth Bale chan mah se Real Madrid an talbuai phah lo - Cristiano Ronal-do an neih miau avangin. Portugal captain hian Inrinni zan khan Sporting Gijon lamah goal hnih a khung a, a team hi 2-1 a hnehna chanpuiin La Liga table chung berah an awm chhunzawm zel.

Bale inhliam vanga inkhel bul ṭan  Lucas Vasquez chu minute 5-na lekah penalty area-ah tih tluk a ni a, Ronaldo-a'n goal-a chantir turin harsatna a nei lo. Portuguese forward hian minute 18-naah an goal hnihna a khung chhunzawm lehnghal bawk. Real Madrid hian minute 18 chhunga goal hnih an khung avangin awlsam taka chak tur angin an lang hman a, beisei ang ngawt erawh a ni bik lo.

Minute 35-naah Carlos Carmona chuan Sporting Gijon tan goal khat a khung ve leh a, hun tawp nan minute 13 chiah a awm tawh tihin mikhual team hian penalty an hlawh chhuak bawk - Real fan te thin phu rang hman mah se an vanneih a kaltluang a, Croatian forward  Duje Cop chuan an penalty hlawhchhuah chu goal chung lamah a thlawh a, hun tawp dawna hnai set sawt aṭanga a hun ṭha neih chu  Keylor Navas chuan ṭha takin a dan sak bawk.

Zidane a lawm lo

Real Madrid coach Zinedine Zidane chuan, "Kan ruahmanna engmah kan hlawhtlintir theih loh avangin kan tan chuan game theihnghilh daih tlak a ni a, ka beisei angin kan khel chhuak lo a ni. Kan khelh danah ka lawm lo a, hetiang hi a thlen chang a awm tih erawh ka pawm. Hma taka goal hnih khungin game kha kan thuhnuaia dah thei tur kan ni a, mah se chutiang chuan kan ti si lo a ni," tiin a lawm lo hle.

Zidane chuan sawi chhun-zawmin, "Game kha awlsam taka nei thei kan ni a, mah se a harsa zawngin kan kal tlat si. Table chung bera kan la awm miau avangin a hlim erawh ka hlim a, tun aia hmasawn zawk kan tum ang," tiin a sawi.

Record aiah nomawi

Real Madrid-in tun season-a inelna hrang hrangah match 31 chhung a zawnin tlawm hmel an hmu tawh lo a, an club chanchina a zawna tlawm hmel an hmuh loh rei pahnihna a ni. Mahse, he record vang ngawt hian Zidane a hlim ve lo.

French manager Zidane chuan, "Tlawm hmel hmu loa hei leh chen kaltluan hi a ṭha a, mah se chu aia pawimawh chu season tawpa kan awmna a ni. Real Madrid player ka nih lai khan season khat chu inelna hrang hrangah hma kan hruai reng a, mah se season tawpah eng nomawi mah kan chawi lo. Season tawp hi a pawimawh ber chu a ni," a ti.

Zidane chuan sawi chhun-zawmin, "Tuna kan thlir tur chu nakkum June-ah khawi hmunah nge kan awm ang tih hi a ni. Tuna kan dinhmun ngai reng kan luah thei chuan nomawi chu kan nei ngei ang," tiin khelh ṭhat tluan chu thil pawimawh a nih thu a sawi.

Ronaldo leh record

Ronaldo-a'n tun season-ah league match 10 khelin goal 10 a khung tawh a, La Liga-ah top scorer ni mekin a hnuai chiahah goal riat khung tawh Lionel Messi leh Luis Suarez an awm - Barca forward pahnih hian nizan inkhela goal an khung dan a zirin top scorer dinhmun hi a dang thei thung.

Kum 31-a upa forward hian penalty a khung chiah khan La Liga-a penalty vawi 55 a khungna chiah a ni a, Mexico legend Hugo Sanchez chu  La Liga-a penalty khung hnem lama a phak loh awmchhun a ni tawh - Real Madrid striker hlui hian penalty 56 a khung avangin he record hi Portugal captain hian a khum ngei dawn niin a lang.