Champion lai Chennaiyin an chuai

Indian Super League khelh mekah Inrinni zan khan Chennaiyin FC leh Northeast United chu goal thum ve ve khungin an inhnehtawk a, Chennaiyin tan semifinal beisei ngam chi a ni tawh lo. Chennai club tan hian Nigerian striker Dudu chuan hattrick siamin vawi thum lai a club hi hmahruai pui mah se beidawng duh lo NorthEast United-in an sual let zel a, Nicolas Velez-a'n goal hnih a khung bakah Shouvik Ghosh chuan goal khat a khung ve bawk.

Chennai club tan Jerry Lalrin-zuala'n inkhel bul a ṭan a, bench lamah Daniel Lalhlimpuia chuan hun hmangin hliam vangin Jeje Lalpekhlua a la inlan thei lo thung. NorthEast United tan Lalrempuia Fanai chuan inkhel bul a ṭan laiin Jerry Mawihmingthanga leh Lallianzuala Chhangte te tan hmun a awm lo thung.

Season hmasaa Chennaiyin champion puitu Jeje chuan, "Hun tawp dawnah kan goal neih kan hum thei lo ṭhin a, chak kan inbeisei zanah pawh rin loh takin kan chak lo leh ṭhin. Kumin nomawi chu kan tan a ni lo a ni ang," tiin Vanglaini palai hnenah a sawi a, semifinal beisei chiah a inngai tawh lo.

Zirtawpni zan ISL inkhelah Kerala Blasters chuan semifinal lut tura an beiseina an chhi nung thar ve leh thung a, an mikhual FC Pune City chu Duckens Nazon leh captain Aaron Hughes goal khung hmangin 2-1 in an hneh a, Pune goal awmchhun hi Anibal Rodriguez khung a ni thung.