Bayern leh Leipzig inum zel
Bundesliga kaithar RB Leipzig chuan season duhawm hman chhunzawm zelin Zirtawpni zan khan khualmualah Freiburg 4-1 a hnehin league hmahruaitu an ni zui zel. Inrinni zan khan champion lai Bayern Munich pawhin 2-1 a Bayer Leverkusen hnehin an nomawi humhim turin an kal zel - inkhel dangah Borussia Dortmund erawh an chak lo thung.
Leipzig an mak!
May 19, 2009 a din chauh ni mah se Leipzig hian Bundesliga-a an season khatnaah club lian dang tam tak tih theih loh an ti mek. Germany Under-21 striker Timo Werner-a goal hnih leh Naby Keita leh Marcel Sabitzer te goal khung hmangin hnehna an chang.
Austrian manager Ralph Hasenhuttl-a kaihhruai Leipzig hian tun season match 12 khelh tawh aṭangin hneh loh an la tawng lo a, vawi kua hnehna chang tawhin vawi thum dang chu an khingpuite nen an inhnehtawk - point 30 hmuin Bayern Munich lakah point thumin hma an hruai mek.
Bayern chak hram
Allianz Arena-ah Bayern Munich fiahin an awm a, an paltlang hram. Carlo Ancelotti kaihhruai Bayern hian league match hnih leh Champions League match pakhata hnehna an chan zawh loh hnuah Inrinni zan khan Thiago Alcantara leh Mats Hummels te goal hmangin hnehna an chang.
Captain Philipp Lahm thawhrah sengin Thiago chuan minute 30-naah goal hmahruai a khung. Mikhual Leverkusen-in si an phur rei duh bik lo. Goal an chhuah aṭanga minute ngana lekah Hakan Calhanoglu leh Julian Brand ten mawi taka ball an in one-two hnuah Calhanoglu-a'n an siphurh a sut ve nghal. Second half
ṭan tirah defender Hummels-a'n Joshua Kimmich corner pet chu an goal hnih nan a tauh lut a, goal dang a luh belh lo.
Bayern manager Ancelotti chuan, "Match hnih kan chak loh hnuah result duhawm tak kan nei leh thei ta a, a lawmawm hle. Ka naute khan ka ruahman leh duh dana an khelh theih avangin fak an phu," tiin inkhel chungchang a sawi.
Ancelotti chuan sawi chhunzawmin, "Leipzig hian season ṭha leh duhawm tak an hmang mek a, hmahruaitu an ni hi an lawmpui awm hle. Chutihrualin kan tana pawimawh ber erawh season tawp huna a chung bera awm a ni," a ti.
Inkhel dang
Bayern Munich an hneh hnua an legaue match hmasa berah Borussia Dortmund an chak lo. Eintracht Frankfurt tana Szabolcs Huszti goal khung chu Pierre-Emerick Aubameyang-a'n sut mah se substitute Haris Seferovic goal khung vangin Dortmund chu tun season-a a vawi thum nan an chak lo.
Dortmund manager Thomas Tuchel chuan, "Ṭan aṭanga a tawp thlenga kan khelh dan kha hriatthiam a har zawk hial. Kan taksa bakah kan rilru a inpeih lo ni berin a lang, kan khelh danah a lungawi thlak loh hle a, insiamṭhat thuai kan ngai. Tun season chhungin a changin kan khel ṭha em em a, a changin kan hniam leh hle si a, hriatthiam a har a ni," tiin a sawi.
Inkhel dangah Leipzig ang thoa hneh loh la tawng lo Hoffenheim chu Borussia Monchengladbach nen 1-1 in an inhnehtawk. Arsenal midfielder hlui Serge Gnabry chuan goal khung chhunzawm zelin Werder Bremen leh Hamburg te 2-2 a an inhnehtawkna inkhelah goal khat a thawh ve leh bawk.