Chanmari FC ngam loh Aizawl FC

28th November, 2016

K. Malsawmkima kaihhruai Aizawl FC-in MFA Super Cup final-ah Chanmari FC an hneh tawh a, Mizoram Premier League round khar nan an hneh nawn leh sak bawk.

Inrinni zan inkhel hmuh-nawm takah I League club AFC tan Bright Middleton Mends leh F. Lalremsanga ten hun chanve hma lamah goal an khung a, second half-a Malsawmfela penalty-in Chanmari FC a chhan zo lo.

Aizawl FC-in 2-1 an chak avangin pathumnaah an invawrh chho a, Chanmari FC pahnihna an nih tak avangin semifinal-ah MPL2 & MPL3 final rematch en tur a awm ang.

Chanmari ṭhat lai?

Chanmari FC-in an match hnuhnung berah Ramhlun North 2-0 in an hneh a, tun season-a an khelh ṭhat ber
ṭumah a ngaih theih. AFC an hmachhawn dawn hian player pawh an dam kim.

Amaherawhchu inkhelh hmain AFC boss Mala chuan, "Chanmari FC hi team ṭha tak an ni a, player pawh an nei ṭha. Amaherawhchu he team hi MFA Super Cup final-ah kan hneh," tiin a vau lawk a, Lalsangzuala Hmar hote an thiamna angin an khel chhuak lo.

Aizawl FC-in Chanmari ṭhat lai a ni tih an hre lo a, vei lam a-
ṭang^-a Brandon VL Remdika cross chu Bright Mends-a'n leia a tlak hmain a pet goal nghal. Ghanaian forward Mends hian a chance ṭha dang chu hnai tak aṭangin a khung lo a, Chanmari an vannei.

First half tawp hma hretin B. Zoramthara vawrh chu Lalremsanga'n box pawn aṭangin a volley goal a, goal ropui a ni.

Chanmari tana langsar awm chhun chu Leonce Dodoz a ni a, Ivorian forward hian AFC tlarhnung tan a harsatna a siam fo a, Dodoz-a sut kuak sa hi Malsawmfela'n a hmang
ṭangkai lo. Second half-ah erawh Sawmfela hian Lalrinchhana penalty hlawhchhuah chu goal-ah a chantir tho a, Ramhlun South tlangval hian goal 10 khungin Chanmari West captain Laldampuia nen an goal khung zat a inang chiah.

Rawlthar rintlak

Aizawl FC-in inhliam vang--in tawnhriat nei ṭha de-fender Lalramchullova leh Lal-rinzuala Khiangte-te an chhawr thei lo a, Nigerian mid-fielder Benjamin Onome lah vawi khat chhawr a nih hnu-ah Mala'n ring ngam tawh lo.

I League club tlarhnungah Jonathan Lalhriatkima leh Hmingthanmawia (Valpuia) te dah dun an ni a, Valpuia hi AFC Under 18 player niin senior team zingah vawi khat chiah a practice. He ti chung hian Valpuia leh Jonathan-a te inkawp hian MPL5-a attacking na ber club an dang thei a, Hnahthial tlangval Jonathan hi man of the match-a thlan ni bawk.

Dodoz kan dang

Aizawl FC coach K. Mal-sawm-kima chuan, "Dodoz-a tum ber kha chu pet goal a ni ang a, mah se a pet goal miah loa, kan dang hneh a ni lawm ni," tana Chanmari tana khel ṭha ber Dodoz pawhin an tlarhnung a sut hawn loh thu a sawi.

AFC hian an chak chuan semifinal-ah Chanmari FC an hmachhawn thei tih hre rengin chak tumin an khel a, Sanga hoten an draw chuan I League club an pumpelh tih hre chungin an si phurh sut an tum thung.

Aizawl FC an tumah an hlawhtling a, final kalkawngah MPL final hnu-hnung pahniha an hneh Chan-mari FC an hmachhawn dawn.

Chanmari FC coach Lal-sang-zuala Hmar chuan inkhelh banah interview a hmachhawn lo a, a pum nat avangin dressing room-ah a lut tlang.

Tute nge inlan?

Aizawl FC (4-4-2): Lalawmpuia (Zothanmawia 32'); Ricky Lallawmawma, Hmingthanmawia, Jonathan Lalhriatkima, Lallawmzuala; Brandon Vanlalremdika, B. Zoramthara, Lalnuntluanga (Vanlalthazuala 83'), William Lalnunfela (Lalawmpuia Hnamte 68'); F. Lalremsanga, Bright Middleton Mends.

Chanmari FC (4-3-3) : F. Lalmuanawma; MS Dawngzela, Umunnakwe Ugochukwu Godswill (Lalrinchhana Tochhawng 54') , Lalmuanawma, Ramfangzauva; R. Malsawmtluanga, Rochhingpuia (Isak Vanlalruatkima 80'), Lalrinchhana; Vanlalbiaa Chhangte (Lalruatfela Zote 64'), Malsawmfela, Leonce Dodoz.

ZoFooty Statistics

Aizawl FC FC 2 - 1 Chanmari FC

AFC : Bright Middleton Mends 6'; F. Lalremsanga 45’+1

CFC : Malsawmfela 56’ (P)

MoM: Jonathan Lalhriatkima, Aizawl FC

48% Ball Possession 52%

11 Shots 17

7 On Target 7

1 Yellow Cards 1

0 Red Cards 0

Powered By Rainbow Multibrand

Mobile Showroom