Goal 25: Jeje aia thiam an awm lo Sunil Chhetri chunga leng Mizo tlangval

India rama football website changtlung bera chhal ngam Goal.com chuan India rama football journalist langsar 25 zirchianna hnuaiah Indian footballer ṭha 25 thlanna Goal 25 chu a vawi khat nan an huaihawt a, pakhatna chu Mizo tlang-val Jeje Lalpekhlua a ni.

Hnahthial tlangval hnuai chiahah hian India tana goal khung hnem ber Sunil Chhetri chu pahnihna a ni a, Khasi tlangval Eugeneson Lyngdoh chu pathumna a ni bawk - Goal in India ram footballer ṭha ber a thlanna hi 2015-16 season a an chet dan aṭanga chhut niin Jeje tluk zo an awm lo.

Indian footballer ṭha 25 thlan chhuah zingah hian Jeje bakah Mizo tlangval Lalchhuanmawia Fanai leh David Lalrin-muana te an lang bawk. Aizawl FC captain hlui David Lalrinmuana hi 17-naah a awm a, Lengpui tlangval Chhuantea hi 25-na a ni thung.

Sulhnu ropui

Tun hnai kum hnih chhung kha Jeje tan chuan a hun tawn duhawm ber pawl a ni - I League a Mohun Bagan a champion pui hnuah Indian Super League (ISL)-ah Chennaiyin FC a champion pui a, SAFF Championship-ah India champion puiin Mohun Bagan chu Federation Cup nomawi a chawipui bawk.

Mimal chawimawina pawhin Jeje-a kiansan lo. India international striker hi season hmasa ISL-ah khan Emerging Player of the Tournament-ah thlan a ni a, Football Players Association of India's (FPAI) Player of the Year a ni bawk - heng chawimawina zawng zawng dawng tur hian Jeje-a'n sulhnu ropui tak a hnutchhiah.

Pune FC-a a career
ṭantu striker hian June 2015 - June 2016 chhung khan ram leh club tan vawi 44-a inlanah goal 32 tehmeuh a khung a, Federation Cup-ah goal riat khungin Fed Cup tournament khata goal khung hnem ber record a siam a, AFC Cup-ah Mohun Bagan chu last 16 bak thlenpui thei lo mah se goal ruk khungin Asia huap inelnaa tournament khata Indian player zinga goal khung hnem ber record thar a siam bawk.

Jeje-a thukhawchang

Jeje chuan, "Award dawn hrim hrim hi a hlu a, ka vannei ve bawk a ni. Goal 25 hi an vawi khat semna a nih avangin a hlut dan hi a danglam bik lehzual a, India rama football journalist langsar 25 zetin thiam bera an thlan chhuah nih chu thil nuam tak a ni," tiin a chawimawina dawn chu hlu a tih thu Vanglaini palai hnenah a sawi.

India rama football striker ṭha an sawiin Baichung Bhutia leh Sunil Chhe-tri hming lamrik
ṭhin a ni. Baichung-a'n inkhelh a chawlhsan hmain Sikkemese Sniper hi footballer dang zawng chunga leng a ni a, a chawlh hnua Baichung-a pheikhawk hnutchhiah inthawlhtu chu Sunil Chhetri a ni - tunah Jeje Lal-pek-hlua a lo lang ve leh ta.

Hnahthial tlangval chuan, "India senior team-a khelh hi ka tum ber ṭhin a ni a, Baichung leh Sunil hi kan khawih phakah kan ngai ngai lo a, mi zawng zawngin kan chung en an ni. Mahse, vawiinah chuan Chhetri chungah awmin chawimawina ka dawng a, ka beisei ngam loh thil a ni. Tunah chuan ka thlen chin aṭanga a aia sang zawk zel thlir a hun ta," tiin Mizo tlangval hian a thlen chinah duhtawk mai tum loh thu Vanglaini palai a hrilh.

Goal-in player

Ṭha 25 a thlante

1. Jeje Lalpekhlua

2. Sunil Chhetri

3. Eugeneson Lyngdoh

4. Gurpreet Singh Sandhu

5. Rino Anto

6. Sandesh Jhingan

7. Debjit Majumder

8. Udanta Singh

9. Pronay Halder

10. Kinshuk Debnath

11. Arnab Mondal

12. Amrinder Singh

13. Bikash Jairu

14. Dhananchandra Singh

15. CK Vineeth

16. Thoi Singh

17. David Lalrinmuana

18. Jackichand Singh

19. Pritam Kotal

20. Robin Singh

21. Arata Izumi

22. Mohammed Rafique

23. Rowlin Borges

24. Augustin Fernandes

25. Lalchhuanmawia Fanai