Youth World Boxing-ah Sachin Singh-a'n gold medal a la

AIBA Youth World Boxing Championship 2016-ah Sachin Singh-a'n unanimous decision-a Cuba boxer Jorge Grinan hnehin gold medal a la. Inelna hi St. Petersburg, Russia-ah November 14-27 inkar khan neih niin India Star 1 coach C. Vanlalchhuanga, Ṭhuampui chu coaching staff zingah a tel.

Boxing Federation of India (BFI) president Ajay Singh chuan Sachin hnenah nuai khat an hlan tur thu Inrinni khan a puang. Kum 16-a upa Sachin hian kum 2010-a Vikas Krishnan-a'n gold medal a lak hnuah pakhatna dinhmun hauh leh thei hmasa ber niin Indian boxer zinga gold medal la thei pathumna a ni.

Mizoram Boxing Association (MIZBA) chuan India coach Chhuanga an lawmpui thu an sawi a, Mizoram aiawh tur thlanna 'MIZBA-LPS Night Fight' an neih tur thu an puang bawk. December 8-13 inkar hian Guwahati-ah Senior National Boxing Camp neih a ni dawn a, Mizoram aiawh tur zawnna chu December 3 hian Ramhlun Boxing Centre-ah neih a ni dawn a, en man a awm ang.