Reds chak zanah lawm a kim lo
Liverpool-in Premier League nomawi an beiseina chhi nung turin Sunderland chu 2-0 in hneh mah se an lawm erawh a kim lo - player pawimawh Philippe Coutinho chu kerek hliam vangin zawnchhuah a ngai a, Brazilian midfielder chawlh hun chhung tur hi a la hriat theih loh.
Inrinni zan inkhelah Man-ches-ter City an awm mai mai bik lo. Pep Guardiola naute hian Burn-ley lakah goal chhuah hmasa zet mah se Sergio Aguero an neih miau avangin an comeback a, Argentine striker goal hnih khung hmang hian 2-1 in hnehna an chang.
Reds an kal zel
Liverpool-in Sunderland an mikhualna inkhelah tun hnaia harhtharna chang Black Cats player-te tlarhnungah an inrem-khawm avangin Reds-in goal an nei lawk thei lo a, an goal hma-sa zawk hi minute 75-naa Divock Origi khung a ni. Injury time-ah Coutinho hliamtu Didier Ndong chuan penalty area-ah Sadio Mane a ti tlu a, Senegalese forward penalty hlawhchhuah hi James Milner chuan an chak nem ngheh nan a khung a ni - Black Cats tan Steven Pienaar leh Duncan Watmore ten hun
ṭha nei ve bawk mah se goal-ah an chantir thei lo.
Liverpool-in inelna hrang hrangah match 14 chhung chu tlawm hmel an hmu ta lo a, league match bikah vawi 11 chhung chak loh hmel hmu loin an awm tawh. Premier League-a Liverpool kaltluan nana player pawimawh chu hliam vanga lakchhuah ngai Coutinho a ni a, Inter Milan midfielder hlui hian goal nga khungin assist vawi ruk a nei tawh. Reds boss Jurgen Klopp chuan, "Countiho hian a kerekah hliam a nei a, a rei zawng tur sawi theih a la ni lo," a ti a, Roberto Firmino pawhin hliam nei ve mah se a serious loh thu a sawi bawk.
Klopp thukhawchang
Liverpool boss Jurgen Klopp chuan, "Game ṭha tak kan khel a, chak kha kan phu a ni. Sunderland khan defensive game an khel a ni mai thei a, ka hrethiam a ni - khatianga khel lo thei lo khan kan siam miau a ni. Khatiang taka defensive game khel kha ka la hmachhawn ngai loh avangin a harsa a, mah se kan rilru zawng zawng kan pek avangin a tawpah kan tal chhuak a ni," a ti.
Reds hian inkhel pumpuiah 78% ball an chang a, Sunderland goal-ah pet goal tumin vawi 27 zet an pet bawk.
City an chak
Manchester Cioty-in Burnley khelmuala goal an chhuah hmasak hnuah champion tum zia an chhuah a, chak zawkah an ṭang. Mualneitu team hian beisei loh takin minute 14-naah goal hmahruai an khung. City defender Nicolas Otamendi-a'n Dean Marney zawnah tak ball a tauh thlak avangin English midfielder hian yard 25 vela hla aṭanga volley goal nan a hmang. City-in ngai awh lawk lo mah se minute 37-naa Aguero-a'n an si phurh sutna goal a khung hnuah erawh an hawikir tawh lo.
Argentine striker hian minute 60-naah an goal hnihna a khung leh a, Fernandinho hnen aṭanga a ball hmuh a shot chu Burnley tlarhnung pherh karah a khung. City-in inkhel thunun mah se an vanneih thu hi sawi hmaih theih a ni chuang lo - inkhel
ṭantir lamah Burnley goal 'khilai' tu Otamendi-a'n penalty area-ah Jeff Hendrick a ti tlu a, Argentine defender hi penalty a chawi loh avangin a vannei takzet.
City boss Guardiola chuan, "England-ah chuan long ball an khel nasa a, hei hi Spain leh Germany-a an tih ngai loh a nih avangin ka inzir zel a ngai dawn a ni. Ka player-te zawng zawngin chak duhna thinlung an pu a, ka hlim takzet a ni. English football-ah hian long ball piah lama zir tur ka la neih cheu chu referee te hi a ni. A chang leh foul a ni a, a hnu lawkah a ni lo leh a, ram dang nen a in ang lo em em a ni," tiin referee lakah a lawm bik lo.