Haaland-a'n history a siam

Zirtawpni zan khan Borussia Dortmund-in FC Cologne 5-1 in an sawp a, substitute Erling Braut Haaland chuan goal hnih khungin Bundesliga match hmasa pahniha goal nga khung thei hmasa ber a ni.

Norwegian forward hi minute 65-naah Thorgan Hazard a thlak a, hetah hian Dortmund chuan Raphael Guerreiro (1'), Marco Reus (29') leh Jadon Sancho (48') hmangin goal thumin hma an hruai tawh.

Kum 19 mi Haaland hian goal hnih a khung belh leh a, minute 77-naah ball per let chu goal-ah chantirin minute 87-naah keeper a bum hnuah angle zim tak aṭangin a khung leh bawk. Manchester United chan loh Haaland-a goal khung theih zia chu media lam chaw tui ber a tling pha.

Dortmund a zawm hmain Haaland hian Red Bull Salzburg tan season chanve chhungin match 22-ah goal 28 a khung a, heng zingah hian Champions League match ruka a goal riat khung pawh a tel.

Salzburg leh Dortmund tan tun season-ah goal 33 a khung ta a, minute 46 dana goal khat zel khung a ni. German club tan phei chuan match hnih khelh tawhah bench aṭang ve vea a luh avangin minute 12 danah goal a khung!