Rodri-a'n training a zawm

Manchester City midfielder Rodri chu tihrawl hliam vanga a chawlh reng hnuin, club training a zawm ve leh ta a, Aston Villa laka tlawm hlim City fan-te tan chuan thu hriat nuam tak a ni ang.

Kum 29 mi midfielder hi October 5 zana 1-0 a Brentford an hneh ṭum khan hliam vangin lakchhuah a ngai a, kar thum leh a chanve zet chu inkhel loin a awm tawh.

Rodri chawlh chhung hian City hian Everton (2-0) leh Villarreal (2-0) te an hneh a, Aston Villa (1-0) lakah an tlawm thung - tunah erawh Rodri-a'n club training a zawm leh ta.

Spanish midfielder tel loin, season hmasa tluan khan City an talbuai a, tun season-ah a tel loin match khat an tlawm leh ta der - zanin dar 1:15-ah League Cup fourth round khel turin Swansea City an lenchilh zui dawn.

Mahse, Rodri-a tan Swansea hmachhawn nghal chu a hma hret mai thei a, Pep Guardioala-a'n a midfielder pawimawh hi match hmabak hautak an neih atana khek a thlang zawk a nih pawhin a mak lo ang.

City hian November international break hmain beisei phak baka season hmang ṭha Bournemouth, Borussia Dortmund leh Liverpool an la hmachhawn dawn a, Pep-a tan squad siksawi thiam a pawimawh dawn.