Arsenal-in Brighton mikhual dawn

Premier League hmahruaitu Arsenal chu zanin dar 1:15 hian League Cup fourth round khel turin an inlan dawn a, EPL team hmuhnawm pawl Brighton & Hove Albion an mikhual dawn.

Gunners hian Premier League table chung ber an luah mek a, anmahni hnaih bertu Bournemouth aiin point liin an sang tawh zawk - Liverpool laka an tlawm hnuah khan league match ruk khel leh tawhin, an la tlawm miah lo.

Arsenal hi Champions League match thum an khelh tawhah an chak vek bawk a, an hneh zingah Atletico Madrid 4-0 ngawta an sawp chu a tel - Gunners hi an 'form' rem rem hle.

Hetihrual hian hliamin Arsenal a tlakbuak ngun takzet. An league match hnuhnung bera, 1-0 a Crystal Palace an hnehna inkhelah pawh hliam vangin player pathum ngawt lakchhuah an ngai!

Midfielder pawimawh Declan Rice, defender pawimawh pahnih Riccardo Calafiori leh William Saliba te chu hliam vanga lakchhuah an ni a, bench aṭanga luhtir Gabriel Martinelli pawhin hliam tenau a nei.

He thu buatsaih a nih lai hian player pali dinhmun hi chiang taka sawi a la awm lo a, inkhelh zawh khan Gunners boss Mikel Arteta chuan, "Willy lakchhuah a ngai a, Declan khan player dang nen an intauhna lamah hliam a nei bawk.

"Riccy dinhmun pawh chiang taka sawi a harsa a, Martinelli pawh khan hliam tenau a neih thu a sawi a, kan enfiah vek ang," a ti a, a la chiang bik lo.

Arsenal hian hliam vangin Gabriel Jesus, Kai Havertz, Noni Madueke leh captain Martin Ødegaard te an chhawr thei lo mek bawk a, EPL bakah Champions League, League Cup leh FA Cup te nen match khelh tur a tam a, an damdawi in lun lutuk hian lu a tihai viauin a rinawm.

Chutihrual chuan zanina an inkhel tur erawh League Cup a nih avangin Palace laka inhliamte hi dam hman pawh ni se, an chawlh hahdamtir a rinawm zawk a, Arteta-a'n fimkhur taka squad a rem a ṭul dawn.