Wembanyama hoin Spurs chak zel

San Antonio Spurs chuan NBA regular season bul an ṭan fuh chu an chhawm nung zel a, a zawna vawi li an chakna ni turin Toronto Raptors chu 121-103 in an hneh.

Nimin zing inkhelah Spurs tan hian an thiampuipa Victor Wemba-nyama chuan point 24 a nei a, hnehna an chan theih nan a thawkhlawk hle, ani bakah hian Stephon Castle (22 points) leh Harrison Barnes (18) te an langsar bawk.

Inkhel dangah Oklahoma City Thunder chuan Shai Gilgeous-Alexander-a point 23 neih hmangin Dallas Mavericks chu 101-94 in an hneh a, point 22 laia an san falna chu Maverics lamin point khat lekah tihniam hman mah se, a tawpah an tho chhuak leh ta zawk a ni.

Utah Jazz tan Lauri Markkanen a vul bawk - Markkanen hian NBA a khelh china point a neih tam ber ṭum tawng turin point 51 a nei a, a team Jazz hi Phoenix Suns lakah 138-134 in a chakpui.

Jazz player zingah Karl Malone chuan kum 1998 khan point 50 a lo nei tawh, ani hnuah Jazz player zinga regular season match-a point 50 nei tling leh thei hmasa ber a ni hial.